Bibliography
Z
Getatchew Haile. Voices from Däbrä Zämäddo. Acts of Abba Bärtälomewos and Abba Yoḥannǝs, 45 Miracles of Mary. Aethiopistische Forschungen 79. Wiesbaden: Harrassowitz Verlag, 2013.
-
- በስመ፡ እግዚአብሔር፡ ሕያው፡ እምቅድመ፡ ዓለማት፡ ዘሀሎ፨
- ወበስመ፡ ማርያም፡ እሙ፡ ሕትምት፡ በተደንግሎ፨
- ኰኵሐ፡ ሃይማኖት፡ ዮሐንስ፡ ለጴጥሮስ፡ ዘትትማሰሎ፨
- ናሁ፡ ወጠንኩ፡ ርድአኒ፡ ጽሒፈ፡ ውዳሴከ፡ ኵሎ፨
- ወእምተአምሪከ፡ ዘክህልኩ፡ እዜኑ፡ በመትሎ፨
-
- ሰላም፡ ለዝክረ፡ ስምከ፡ መጥምቀ፡ መለኮት፡ ጸዋሚ፨
- ወሐዋርያ፡ ቡሩክ፡ ዘሰመይዎ፡ ቀዳሚ፨
- ዮሐንስ፡ ኅሩይ፡ መትልወ፡ ጳውሎስ፡ ዘብንያሚ፨
- ከመ፡ ያግዕዘነ፡ እምቅኔተ፡ ዓለም፡ ማሕመሚ፨
- ምስሌነ፡ የሀሉ፡ ፍቅርከ፡ ቀዋሚ፨
-
- ለሥዕርተ፡ ርእስከ፡ በቅብአ፡ ሃይማኖት፡ ጥሉል፨
- ወለርእስከ፡ ሰላም፡ ጌራ፡ መድኃኒት፡ ክሉል፨
- መምህረ፡ አሕዛብ፡ እንድርያስ፡ ዮሐንስ፡ ልዑል፨
- ዕቀበነ፡ ለደቂቅከ፡ እምዘመነ፡ መንሱት፡ ወኃጕል፨
- ከመ፡ ኖላዊ፡ የዓቅብ፡ መርዔቶ፡ በሐቅል፨
-
- ሰላም፡ ለገጽከ፡ ዘአዳም፡ ርእየቱ፨
- ወለአዕይንቲከ፡ ሰላም፡ ምስለ፡ ቀራንቱ፨
- ዝውገ፡ ያዕቆብ፡ ዮሐንስ፡ ዘጽኑዕ፡ በሃይማኖቱ፨
- አንግፈነ፡ ለደቂቅከ፡ እምፃረ፡ ኃጢአት፡ ከንቱ፨
- እስመ፡ ግዙፍ፡ ወክቡድ፡ ውእቱ፨
-
- ሰላም፡ ለአእዛኒከ፡ ለሰሚዓ፡ ወንጌል፡ ዘጸለዋ፨
- በድምፀ፡ ፍግዓ፡ ዘለዓለም፡ እለ፡ ኢያንቀዋ፨
- ቢጸ፡ ሐዋርያት፡ ዮሐንስ፡ ለፍትወተ፡ ዓለም፡ ዘኢየለዋ፨
- ለነፍሰ፡ ዚአየ፡ እሞት፡ ኃጢአት፡ አሕይዋ፨
- እስመ፡ ቍሰል፡ በኅምዙ፡ አበ፡ ደም፡ ዕድዋ፨
-
- ሰላም፡ ለአእናፊከ፡ መዐዛ፡ አፈዋት፡ እለ፡ መነና፨
- ወለመላትሒከ፡ ሰላም፡ ፈለገ፡ አንብዕ፡ ዘኮና፨
- ከመ፡ ፊልጶስ፡ ዮሐንስ፡ ዘመሐርከ፡ ሕገ፡ ቀኖና፨
- ምስለ፡ ያዕቆብ፡ ዘእልፍዮስ፡ ወናትናኤል፡ ዘቃና፨
- ለረዲኦትየ፡ ነዓ፡ እምልዑል፡ ደመና፨
-
- ሰላም፡ ለከናፍሪከ፡ ዘኢነበባ፡ ጽርፈተ፨
- ወለአፉከ፡ ሰላም፡ ዘኢለመዳ፡ ሐሰተ፨
- በርተሎ፡ ዮሐንስ፡ እንተ፡ ትሰብክ፡ ትምህርተ፨
- ምርሐነ፡ ለደቂቅከ፡ እንዘ፡ ታሤኒ፡ ፍኖተ፨
- እስመ፡ አቡነ፡ ወሊቃነ፡ አንተ፨
-
- ሰላም፡ ለአስናኒከ፡ ዘኢለመዳ፡ ሰሐቀ፨
- ወለልሳንከ፡ ሰላም፡ ዘኢያፍቀራ፡ ሰላቀ፨
- ቢጸ፡ ማቴዎስ፡ ዮሐንስ፡ ወዘውገ፡ ታዴዎስ፡ ጥዩቀ፨
- እምንትናቴ፡ ዓለም፡ ኵነነ፡ ሰዋቀ።
- ከመ፡ ርኅሩኃ፡ ልብ፡ አብ፡ ዘይሠውት፡ ደቂቀ፨
-
- ሰላም፡ ለቃልከ፡ ዘድምፀ፡ ንባቡ፡ አዳም፨
- ወለእስተንፋስከ፡ ሰላም፡ ፈዋሰ፡ ኵሉ፡ ሕሙም፨
- ዮሐንስ፡ ቶማስ፡ ገሣሴ፡ ሥጋሁ፡ ለፍሕም፨
- እንዘ፡ ትፌትቶ፡ በዲበ፡ ምሥዋዕ፡ ግሩም፨
- በሥጋ፡ ቅዱስ፡ ወበንፍስ፡ ፍጹም፨
-
- ሰላም፡ ለጕርዔከ፡ በኃሪመ፡ ስቴ፡ ዘጸምዓ፨
- ወለክሳድከ፡ ሰላም፡ ዘኢአነቀ፡ ወርቀ፡ ፍግዓ፨
- ዮሐንስ፡ ማትያስ፡ ለተጋድሎ፡ ዘጠብዓ፨
- ለአፂዶትየ፡ አመ፡ ቀሣሜ፡ ወይን፡ ጐጕዓ፨
- እስከነ፡ እፈሪ፡ ጽድቀ፡ ክልኦ፡ መጺአ፨
-
- ሰላም፡ ለመታክፍቲከ፡ እለ፡ ፃራ፡ መስቀለ፨
- ወለዘባንከ፡ ሰላም፡ ዘተዓጽፈ፡ ኃይለ፨
- ዮሐንስ፡ ማርቆስ፡ እንተ፡ ጸሐፍከ፡ ወንጌለ፨
- እመ፡ ላዕሌየ፡ ብእሴ፡ ዓመፃ፡ ኃየለ፨
- ለረዲኦትየ፡ አፍጥን፡ ወግበር፡ በቀለ፨
-
- ሰላም፡ ለእንግድዓከ፡ በድርዓ፡ ሃይማኖት፡ ርሡይ፨
- ወለኅፅንከ፡ ሰላም፡ ማኅደረ፡ ንጹሕ፡ ንዋይ፨
- ዮሐንስ፡ ሉቃስ፡ ዓቃቤ፡ ሥራይ፨
- እንዘ፡ አሐውር፡ ፍኖተ፡ ኃጕል፡ ከመ፡ ኢይዕርብ፡ ፀሐይ፨
- መንገለ፡ ፍና፡ ጽድቅ፡ ምርሃኒ፡ ለብእሲ፡ ጊጉይ፨
-
- ሰላም፡ ለአዕዳዊከ፡ እለ፡ ሰፍሐ፡ ለጸለት፨
- ለመዛርዒከ፡ ሰላም፡ ዘምስለ፡ ኵርናዕ፡ ወእመት፨
- አበ፡ ብዙኃን፡ ዮሐንስ፡ ተክለ፡ ሃይማኖት፨
- ሠውረነ፡ ለደቂቅከ፡ እምዘመነ፡ ኵሉ፡ መንሱት፨
- ከመ፡ ሠውሮ፡ እግዚእ፡ ለባሮክ፡ ትካት፨
-
- ሰላም፡ ለእራኅከ፡ ወለአፃብዒከ፡ ዘሰፍሑ።
- አመ፡ ለማርያም፡ ትጽልጉ፡ ፍተ፡ በረከት፡ አሜሁ፨
- ዮሐንስ፡ ያዕቆብ፡ ለንጉሠ፡ ነገሥት፡ እኁሁ፨
- በቀላየ፡ ጌጋይ፡ እስመ፡ ተሠጠምከ፡ ናሁ፨
- ለአውጽኦትየ፡ ጸሊ፡ ለአምላክ፡ ቅድሜሁ፨
-
- ሰላም፡ ለገቦከ፡ መንጸፈ፡ ዘመነነ፨
- ወለከርሥከ፡ ሰላም፡ ታቦተ፡ ቅዳሴ፡ ኮነ፨
- ዮሐንስ፡ ወልዱ፡ ለበርተሎሜዎስ፡ አቡነ፨
- በከመ፡ አንሣእከ፡ በምድረ፡ አክዩት፡ ሕፃነ፨
- እሞተ፡ ኃጢአት፡ አንሥእ፡ ነፍስየ፡ ፍጡነ፨
-
- ሰላም፡ ለልብከ፡ ኅሩመ፡ በቀል፡ ወእከይ፨
- ወለኵልያቲከ፡ ፍቱናን፡ በእሳተ፡ መከራ፡ ውዑይ፨
- ዮሐንስ፡ ሳሙኤል፡ ሊቀ፡ ካህናት፡ ነቢይ፨
- ቅብዓኒ፡ እምዕፍረትከ፡ ዘመዓዛሁ፡ ሠናይ፨
- ፂአተ፡ አብሳየ፡ ያእትት፡ ለብእሲ፡ ጊጉይ፨
-
- ሰላም፡ ለሕሊናከ፡ ለፍተወተ፡ ዓለም፡ ዘኢኃሠሦ፨
- ወለአማዑቲከ፡ ምኡዝ፡ እምፄና፡ ስሂን፡ ወአንክሶ፨
- ዮሐንስ፡ እንተ፡ ተወፈይከ፡ ተጰጵሶ፨
- ለዘያንዕስ፡ መንበረከ፡ ዘእግአብሔር፡ አርአሶ፨
- በመንግሥተ፡ ሰማይ፡ ሎቱ፡ እምኵሉ፡ ያንዕሶ፨
-
- ሰላም፡ ለንዋየ፡ ውስጥከ፡ ንዋየተ፡ መቅደስ፡ ዘተመሰላ፨
- ወለኅንብርትከ፡ ሰላም፡ ከመ፡ ማዕከክ፡ አምሳላ፨
- ትሩፈ፡ ምግባር፡ ዮሐንስ፡ ካልአ፡ ብፁዕ፡ ላሊበላ፨
- ብከ፡ ሐንበበ፡ ለድብረ፡ ዘመዶ፡ አስካላ፨
- ወፍሬ፡ ተስፋሃ፡ ተሰምዓ፡ በዓለም፡ ኵላ፨
-
- ሰላም፡ ለሐቌከ፡ ቅንተ፡ ሃይማኖት፡ ዘአጠቀ፨
- ወለአቍያጺከ፡ ሰላም፡ ዘተመሰላ፡ አብላቀ፨
- ዮሐንስ፡ አብርሃም፡ እንተ፡ አብዛኅከ፡ ደቂቀ፨
- ምግበ፡ ዘመንየ፡ እመ፡ ለፍጻሜ፡ ጠንቀቀ፨
- ወስከኒ፡ በጸሎትከ፡ እስከ፡ አቄርብ፡ ጽድቀ፨
-
- ሰላም፡ ለአብራኪከ፡ እለ፡ ደክማ፡ በሰጊድ፨
- ወለአእጋሪከ፡ ዘቆማ፡ ለሰብሖ፡ አምላክ፡ ዋህድ፨
- ከመ፡ አቢብ፡ ሰላም፡ ተአምሪከ፡ ፍድፉድ፨
- ሰሰለ፡ በጸሎትከ፡ ሕማመ፡ መቅሠፍት፡ ብድብድ፨
- እስከ፡ ለዝላፉ፡ ኢይቀርብ፡ ኀበ፡ ዛ፡ ዓጸድ፨
-
- ሰላም፡ ሰኰናከ፡ ወለመከየድከ፡ እለ፡ ጌሣ፨
- ኀበ፡ ኢየሩሳሌም፡ ዘእግዚአብሔር፡ ቀደሳ፨
- ዮሐንስ፡ እንጦኒ፡ ለፍትወተ፡ ዓለም፡ ዘኢኃሠሣ፨
- አውጽአኒ፡ በጽሎትከ፡ እማዕምቀ፡ ቀላይ፡ አበሳ፨
- ከመ፡ እምባሕር፡ ያወፅኡ፡ ዓሣ፨
-
- ሰላም፡ ለአፃብዒከ፡ ወለአጽፋሪከ፡ ዘእግር፨
- ዘኍላቌሆን፡ ዓሥር፨
- ዮሐንስ፡ አቡነ፡ ዘደብረ፡ መምህር፨
- ዕቀበነ፡ ለደቂቅከ፡ እምሐፀ፡ ጸላዒ፡ ሥውር፨
- በነዲፈ፡ ነፍሳት፡ ዘኅምዙ፡ ሳኩር፨
-
- ሰላም፡ ለቆምከ፡ ዘአዳም፡ ራዕዩ፨
- ወለመልክዕከ፡ ሰላም፡ ዘያበርህ፡ ስነ፡ ላህዩ፨
- ዮሐንስ፡ ጸሊ፡ ኀበ፡ እግዚእ፡ ከመ፡ ኤልያስ፡ ነቢዩ፨
- አጽራርየ፡ በላዕሌየ፡ እመ፡ እኪተ፡ ሐለዩ፨
- ከመ፡ ርእሰ፡ ፶ሣልሳይ፡ ቅድሜየ፡ ይግነዩ፨
-
- ሰላም፡ ለፀዓተ፡ ነፍስከ፡ በድምፀ፡ ማኅሌት፡ ሐዋዝ፨
- ወለበድነ፡ ሥጋከ፡ ሰላም፡ እምአፈወ፡ ዕፍረት፡ ምኡዝ፨
- ዮሐንስ፡ ሄኖክ፡ ጸሐፌ፡ ኵሉ፡ ትእዛዝ፨
- በዝ፡ ውዳሴ፡ ስምከ፡ ሶበ፡ ይጸሊ፡ ትኩዝ፨
- ብስራተ፡ ፍሥሐ፡ አስምሃ፡ በእንተዝ፨
-
- ዘንቱ፡ አቡነ፡ ሠናየ፡ ርሰዕ፡ ውኩፈ፡ ጸሎት፡ ወትንባሌ፨
- ላዕከ፡ ማርያም፡ ወወልዳ፡ ዮሐንስ፡ ዕንቈ፡ ቢረሌ፨
- ጊዜ፡ አዕረፈ፡ ዮም፡ አመ፡ ሠላሳሁ፡ ለሐምሌ፨
- ወጽአት፡ ነፍሱ፡ እንበለ፡ ጻዕር፡ ወዐርገት፡ ሉዓሌ፨
- መላእክት፡ ትጉሃን፡ እንዘ፡ ይብሉ፡ ሃሌ፨
-
- ሰላም፡ ለግንዘተ፡ ሥጋከ፡ በእደ፡ ካህናት፡ ሥዩማን፨
- ወለመቃብሪከ፡ ሰላም፡ ቅድስተ፡ ቅዱሳን፨
- ዮሐንስ፡ መትልወ፡ መልከ፡ ጼዴቅ፡ ካህን፨
- ሐውጸነ፡ ለለ፡ ሰዓቱ፡ ወባርከኒ፡ በይምን፨
- ወዕቀበኒ፡ በኵሉ፡ አዝማን፨
-
- እንዘ፡ እትአመን፡ በጸሎትከ፡ ከመ፡ እንሣእ፡ አክሊለ፨
- እንተ፡ አቅረብኩ፡ ንስቲተ፡ ሰላመ፡ አምጣነ፡ ብየ፡ ክሂለ፨
- ተወኪፈከ፡ ዮሐንስ፡ ከመ፡ ኢይርአይ፡ ሀጕለ፨
- ስግድ፡ ቅድመ፡ ፈጣሪ፡ እንዘ፡ ታቄርብ፡ ስኢለ፨
- እንበለ፡ ምግባር፡ በከንቱ፡ የሀበኒ፡ ሣህለ፨
-
- ሰላም፡ ሰላም፡ ለተኣምሪከ፡ እብሎ፨
- አመ፡ በመንፈስ፡ ሖርከ፡ ወትሩፈ፡ ጽጋ፡ ተልዕሎ፨
- ኀበ፡ መድኅን፡ ተወልደ፡ ወተጠምቀ፡ ወኀበ፡ ተከሉ፡ መስቀሎ፨
- ወተመየጥከ፡ ፍጡነ፡ እንዘ፡ ሰዓተ፡ ሠርክ፡ ሀሎ፨
- ጊዜ፡ ተናከርከ፡ ዮሐንስ፡ ዓለማተ፡ ኵሎ፨
-
- ሰላም፡ ለተኣምሪከ፡ ዘተወደሰ፡ ፈድፋደ፨
- እምድኅረ፡ ሞተ፡ በቅልከ፡ ሶበ፡ ተንሥአ፡ ገሀደ፨
- ምሉአ፡ ጸጋ፡ ዮሐንስ፡ ዘሞገስከ፡ ተንዕደ፨
- ጸግወኒ፡ ንጽሐ፡ ልቡና፡ ወጥበበ፡ ልሳን፡ ንዑደ፨
- ንባበ፡ ጽሩዓን፡ በአፉየ፡ ኢይኩን፡ ልማደ፨
-
- ማየ፡ ክረምት፡ መሊኦ፡ በአፍ፡ አፍ፨
- ወበማዕዶቱ፡ ቀዊሞ፡ ብእሲ፡ ሶበ፡ ተስእሎ፡ ኀሊፈ፨
- ወአተብከ፡ ላዕሌሁ፡ በከመ፡ ተጽሕፈ፨
- በኀይለ፡ ዝንቱ፡ ተኣምሪከ፡ ዕቀበነ፡ ዘልፈ፨
-
- እምብዙኅ፡ ተኣምሪከ፡ ከመ፡ ኆፃ፡ ባሕር፡ ደቃቅ፨
- ወእመንክራቲከ፡ ምሉእ፡ ከመ፡ ቀላየ፡ ባሕር፡ ዕሙቅ፨
- ተወኪፈከ፡ ዮሐንስ፡ እንተ፡ አቅረብኩ፡ በሕቅ፨
- ከመ፡ አውፃእከ፡ ምውተ፡ እምከርሠ፡ መቃብር፡ በጽድቅ፨
- እምግበ፡ ኃጢአት፡ አውፅአኒ፡ ለብእሲ፡ ውዱቅ፨
-
- በዝንቱ፡ ቃለ፡ ማሕሌት፡ ወበዝንቱ፡ ውዳሴ፨
- ለዘይስእለከ፡ ብእሲ፡ ጊዜ፡ ረከቦ፡ ድምሳሴ፨
- ርሡይ፡ ወሥርግው፡ ኀይለ፡ ሥላሴ፨
- ሀቦ፡ ኀይለ፡ ለከይደ፡ ዘባነ፡ አንበሳ፡ ወከይሴ፨
- ወላዕለ፡ ድውይ፡ ጸልዩ፡ ለይኩን፡ ፈዋሴ፨
- ተረፈ፡ መልክእ፡
-
- ሰላም፡ ለከ፡ ዮሐንስ፡ አቡነ፡ ዘአዋከይከ፡ አዕዋደ፨
- ተበዋህከ፡ ትኅልፍ፡ በዘተግህደ፨
- ማዕበለ፡ ወሞገደ፨
-
- ሰላም፡ ለከ፡ እግዚአብሔር፡ ሕያው፡ ዘጸዓጠከ፡ በእዱ፨
- ፍትወተ፡ መዓዛ፡ እምጽጌ፡ ተቅዱ፨
- ጵስጥቂስ፡ ዘእምናርዱ፨
-
- ሰላም፡ ለከ፡ ዘኢሞእከ፡ ረዋዲ፨
- ፍትወተ፡ ሥሃ፡ አባዲ፨
- እንተ፡ አቅነተከ፡ ኃብለ፡ ጽድቅ፡ እብኖዲ፨
- ዘያብዕል፡ ወዘያነዲ፨
-
- ሰላም፡ ለከ፡ ከመ፡ ጽጌ፡ ሮማን፡ ለልብሰ፡ ኢጲሞስ፡ በዓውዳ፨
- ወዓዲ፡ ትመስል፡ ቢረሌ፡ ፀዓዳ፨
- ወትምዕዝ፡ እምጽጌ፡ ርረ፨
-
- ሰላም፡ ለከ፡ እንበለ፡ ተምያን፡ ትሁብ፡ እንተ፡ ወርቀ፡ ሃይማኖት፡ መፍዴ፨
- ፈዳየ፡ ልቃሕ፡ ሶበ፡ ይቀውም፡ ዴዴ፨
- ዘጸላዕትከ፡ ነሢአ፡ ርዴ፨
-
- ሰላም፡ ለከ፡ ትርሲተ፡ ሌዋዊ፡ መረግድ፨
- ወልብሰ፡ ተክህኖ፡ ውዱድ፨
- ጰራልዩ፡ ወኢያስጲድ፨
- ያስተርኢ፡ በፀዓድዒድ፨
-
- ሰላም፡ ለከ፡ ያዕቆብ፡ ጻድቅ፡ ከመ፡ ባረከ፡ ወልዶ፨
- ባርከኒ፡ አባ፡ በተአንግዶ፨
- መዝገበ፡ ብርሃን፡ ዘይትረዓይ፡ ወሪዶ፨
- ሰኰናከ፡ ደመናተ፡ ከይዶ፨
-
- ኦአበውየ፡ በርተሎሜዎስ፡ ወዮሐንስ፨
- አእማዲሃ፡ ለደብረ፡ ዘመዶ፡ መቅደስ፨
- አድኅኑኒ፡ እመከራ፡ ሥጋ፡ ወነፍስ፨