መልክአ፡ መርቆሬዎስ፡ ዘደብረ፡ ድማሕ፡
Malkəʾa Marqorewos za-Dabra Dəmāḥ
Image of Marqorewos of Dabra Dəmāḥ
-
- አዕይንተ፡ ልብየ፡ አብርህ፡ ከመ፡ ይሰስል፡ ፁገ፨
- ወበልሳንየ፡ ይትከሠት፡ በእግረ፡ ሕሊና፡ ዘዐርገ፨
- እግዚአብሔር፡ ሀበኒ፡ ድርሳነ፡ መርቆሬዎስ፡ ደርገ፨
- ይሰወጥ፡ ውስተ፡ ከርሥየ፡ እሰከ፡ ይመልእ፡ ድንጋገ፨
- በገይበ፡ ከናፍር፡ እቅዳሕ፡ ፍቅረከ፡ ፈለገ፨
-
- ሰላም፡ ለዝክረ፡ ስምከ፡ ሞገሰ፡ ረድኤት፡ ዘባቲ፨
- ከመ፡ ዮሐንስ፡ መጥመቅ፡ ወይነ፡ አሰክሮ፡ ዘኢይሰቲ፨
- መርቆሬዎስ፡ አቡየ፡ እንቀ፡ ሃይማኖት፡ ከሣቲ፨
- እዜኑ፡ ዕበያቲከ፡ ወሠናያቲከ፡ እንታክቲ፨
- ያስተፌሥሕ፡ መላእክተ፡ ወልበ፡ ሰብእ፡ መዋቲ፨
-
- ሰላም፡ ለቆብዐ፡ ርእስከ፡ ከመ፡ ቃለ፡ መጽሐፍ፡ ጠቢብ፨
- በቆብዐ፡ ክርስቶስ፡ ይትሜሰል፡ እንተ፡ ተወክፈ፡ በዐርብ፨
- ወባዬ፡ ጸቃውዕ፡ መርቆሬዎስ፡ ዘምሳሌከ፡ ንህብ፨
- ወአክናፊከ፡ ጽጌ፡ አቅማሕ፡ ርቡብ፨
- መርዓ፡ እምቤትከ፡ ይውሕዝ፡ ሐሊብ፨
-
- ሰላም፡ ለሥእርተ፡ ርእስከ፡ ዘውገ፡ እንጦንዮስ፡ ቀዳሚ፨
- ዘኢፀፈሮ፡ ኬንያ፡ ለተወድሶ፡ ዓለም፡ በእደ፡ ቀሳሚ፨
- መርቆሬዎስ፡ አቡየ፡ መምህረ፡ ሃይማኖት፡ ኢተቀያሚ፨
- አልቦ፡ አይሁድ፡ ወአልቦ፡ አረሚ፨
- ዘተገድፈ፡ ውስተ፡ በድው፡ ስመከ፡ ዘይሰሚ፨
-
- ሰላም፡ ለመቃብሪከ፡ ድኅረ፡ ነሣእከ፡ ነገረ፡ ኪዳን፨
- ኃጥኣነ፡ ዓለም፡ ኵሎ፡ በዘታድኅን፨
- ወበእንተዝ፡ ትሰመይ፡ በማኅሌተ፡ ምዑዝ፡ ልሳን፨
- እክለ፡ አሕይዎ፡ መርቆሬዎስ፡ ወስቴ፡ መድኃኒተ፡ ወይን፨
- ሰሚዐ፡ ዜናከ፡ ኢትጸግብ፡ እዝን፨
-
- ሰላም፡ ለተአምሪከ፡ በሰዓተ፡ ቅዳሴ፡ ግሩም፨
- ቤተ፡ ክርስቲያን፡ ቅድስት፡ አመ፡ ትትገለበብ፡ በፍሕም፨
- መርቆሬዎስ፡ አርሳኒ፡ ምንኵስናከ፡ ፍጹም፨
- ሐፀነተከ፡ ተጋድሎ፡ ወአልሐቀተከ፡ ጾም፨
- ወበእንተዝ፡ ትትዌደስ፡ በዜማ፡ ጥዑም፨
-
- ሰላም፡ ለተአምሪከ፡ እንተ፡ ይበዝኅ፡ እምኆፃ፨
- ወረድኤትከኒ፡ ይረውፅ፡ እምአሕፃ፨
- መርቆሬዎስ፡ ዐፅቅ፡ ለጒንደ፡ ሕይወት፡ ሠርፃ፨
- ሰይጣንሰ፡ መሠረተ፡ ኵሉ፡ ዐመፃ፨
- ይትነጻሕ፡ እመርሕበ፡ ቤትከ፡ ዘክርስቶስ፡ ሐነፃ፨
-
- አምኃ፡ ሰላም፡ አቅረብኩ፡ ለዝክረ፡ ውዳሴከ፡ ዘልፈ፨
- ለለ፡ አሐዱ፡ አሐዱ፡ እንዘ፡ እከሥት፡ አፈ፨
- መርቆሬዎስ፡ ሀበኒ፡ ዘኢተኀልፍ፡ ኀሊፈ፨
- ጽዋዔ፡ መልክዕከ፡ በኢኊልቈ፡ ኀምሳ፡ ተጽሕፈ፨
- ወእምዝ፡ በድካም፡ መብዝኅቶሰ፡ ተርፈ፨