መልክአ፡ ቴዎድሮስ፡ ዘዓዲ፡ ቂታ፡
Malkəʾa Tewodros za-ʿĀddi Qitā
Image of Tewodros of ʿĀddi Qitā
-
- በስመ፡ እግዚአብሔር፡ ሕያው፡ ለዕጓለ፡ እመሕያው፡ ዘሠምሮ፨
- እስመ፡ ይእዜ፡ ወጠንኩ፡ ስብሐተ፡ መልክእከ፡ ለተናግሮ፨
- ሠናየ፡ ዝብጠት፡ ቴዎድሮስ፡ ድምፀ፡ መክብዩ፡ ከበሮ፨
- ዘይነግር፡ ዜና፡ ጽድቅከ፡ ወዘያሤኒ፡ ዘምሮ፨
- እምአእምሮትከ፡ ክፍለኒ፡ አእምሮ፨
-
- ሰላም፡ ለዝክረ፡ ስምከ፡ ዘጽሑፍ፡ ፊደሉ፨
- ዘያሜንን፡ ወይነ፡ ወዘያረስዕ፡ ነገረ፡ ኵሉ፨
- ቴዎድሮስ፡ ሆሴዕ፡ ለእግዚአብሔር፡ ነቢየ፡ ቃሉ፨
- ለእለ፡ ግብሩ፡ ተዝካረከ፡ ወበዓለከ፡ አብዐሉ፨
- ረድኤተ፡ ፈኑ፡ ወአኅድር፡ በእሉ፨
-
- ሰላም፡ ለፍልሰተ፡ ሥጋከ፡ እምውሳጤ፡ ክዳን፡ መሬት፨
- አመ፡ ዐሡሩ፡ ወሰኑዩ፡ ለወርኀ፡ የካቲት፨
- ቴዎድሮስ፡ ባኦስ፡ መፍቀሬ፡ ማርያም፡ ሩት፨
- ለደብርከ፡ ደብረ፡ ሰላም፡ ይሔውፅዋ፡ መላእክት፨
- ወይኬልልዋ፡ ብርሃናት፡ ዐበይት፨
-
- ይባቤ፡ ሚካኤል፡ ተለዐለ፡ በፍልሰትከ፡ ከብካብ፨
- ወሰማየ፡ ዜማ፡ አጽነነ፡ ድምፀ፡ ገብርኤል፡ ዕጹብ፨
- ምእላደ፡ ጥበብ፡ ቴዎድሮስ፡ ከመ፡ ሰሎሞን፡ መክበብ፨
- ጥበበ፡ ዐቅመ፡ ተመልኡ፡ ባስልኤል፡ ወኤልያብ፨
- ይምላእ፡ ላዕሌየ፡ ዘዚአከ፡ ጥበብ፨
-
- ዐቅመ፡ ወሀብኩከ፡ ሰላመ፡ ከመ፡ ሰላማዊ፡ መልአክ፨
- በበ፡ አሐዱ፡ አሐዱ፡ ለመልክእከ፡ ቡሩክ፨
- ፍትወ፡ መዐዛ፡ ለኵሉ፡ ቴዎድሮስ፡ ሰሊክ፨
- ተወከፍ፡ ዘንተ፡ አምኃየ፡ እግዚአብሔር፡ አምላክ፨
- ከመ፡ እምቅዱሳን፡ ትትዌከፍ፡ መሥዋዕተ፡ ዘሠርክ፨