መልክአ፡ ተክለ፡ ኢየሱስ፡ ዘደብረ፡ ድማሕ፡
Malkəʾa Takla ʾIyyasus za-Dabra Dəmāḥ
Image of Takla ʾIyyasus of Dabra Dəmāḥ
-
- ኦእግዚአብሔር፡ እሳተ፡ ኮሬብ፡ ዘአንበብከ፨
- ዘምስለ፡ ነፋስ፡ ወመሬት፡ ምስለ፡ ማየ፡ ናጌብ፡ ዘአሠነይከ፨
- ፈኑ፡ ሊተ፡ መንፈሰከ፡ ወመንፈስ፡ ቅዱስ፡ አቡከ፨
- ከመ፡ እንብብ፡ መልክኣቲከ፡ ለተክለ፡ ኢየሱስ፡ ገብርከ፨
- እስመ፡ ውእቱ፡ ልሕኵትከ፡ ወአዳም፡ ግብርከ፨
-
- ሰላም፡ ለዝክረ፡ ስምከ፡ ዘተጸውዐ፡ እምንእሱ፨
- በአፈ፡ መላእክት፡ ወሰብእ፡ ዘሰንዱነ፡ ጥምቀት፡ ለብሱ፨
- ተክለ፡ ኢየሱስ፡ መሲሕ፡ ወተክለ፡ ኢየሱስ፡ ኢያሱ፨
- አድኅኖሙ፡ ለደቂቅከ፡ መንገለ፡ አርያም፡ ይፍልሱ፨
- እምአዘቅተ፡ እሳት፡ መፍርህ፡ ዘግሩም፡ ጢሱ፨
-
- ሰላም፡ ለእንግድዓከ፡ ዘተወክፈ፡ ምንዳቤ፨
- በስብሐት፡ ወበይባቤ፨
- ተክለ፡ ኢየሱስ፡ ምዑዝ፡ ኀበ፡ ደብረ፡ ስኂን፡ ወደብረ፡ ከርቤ፨
- ዕቀቦሙ፡ ለደቂቅከ፡ ሥርግዋነ፡ ጥበብ፡ ግልባቤ፨
- በቅድመ፡ መላእክት፡ ወሰብእ፡ መርቆሬዎስ፡ ይቤ፨
-
- ሰላም፡ ለመቃብሪከ፡ ለሰብእናከ፡ ምስካባ፨
- ውስተ፡ ደብረ፡ ድማኅ፡ ቅድስት፡ ጸሎተ፡ ዚአከ፡ ዘዐቀባ፨
- ተክለ፡ ኢየሱስ፡ ምዑዝ፡ በመዐዛ፡ ድንግል፡ ስኂነ፡ ሳባ፨
- ባርክ፡ በመስቀልከ፡ ለገዳምከ፡ ዋልድባ፨
- ወአልዕላ፡ ለምስካይከ፡ እብራዊት፡ ስቃባ፨
-
- ሰላም፡ ለትንሣኤ፡ ሥጋከ፡ በሰዓተ፡ ሌሊት፡ ደኃሪ፨
- እንዘ፡ አነ፡ ዘንተ፡ ኢተዘካሪ፨
- ተክለ፡ ኢየሱስ፡ ፈታሒ፡ ወተክለ፡ ኢየሱስ፡ አሳሪ፨
- አስተምሕር፡ በእንቲአየ፡ እስመ፡ ውእቱ፡ መሓሪ፨
- አኮኑ፡ አእመርናሁ፡ በኪራም፡ አንበሪ፨
-
- ስብሐት፡ ለአብ፡ በዘንቱ፡ ፍጻሜ፡ ዘአብጽሐኒ፨
- አኰቴት፡ ለወልድ፡ በደመ፡ ገቦሁ፡ ዘሐጸበኒ፨
- ወለመንፈስ፡ ቅዱስ፡ ዕባይ፡ እምድካመ፡ ሥጋ፡ ዘአጽንዐኒ፨
- ስብሐት፡ ለማርያም፡ እምነ፡ ኵሉ፡ ትኄይሰኒ፨
- እምነ፡ ፍጡራን፡ አኮኑ፡ ይእቲ፡ ትሤኒ፨
-
- ሰላም፡ ለከ፡ ተክለ፡ ኢየሱስ፡ ሙሴ፡ ውስተ፡ ደብረ፡ ድማህ፡ ሲና፨
- ለለ፡ ጊዜ፡ አውርድ፡ ቡራኬከ፡ መና፨
- እምቃልከ፡ ከርሠ፡ ደመና፨
-
- ሰላም፡ ለከ፡ ከመ፡ ታድኅነነ፡ ነዓ፡ እምነ፡ አፅራሪነ፡ መንታ፨
- በጸሎትከ፡ ኲናት፡ ወጽድቅከ፡ ወልታ፨
- ተክለ፡ ኢየሱስ፡ ዘጎልጎታ፨
-
- ሰላም፡ ለከ፡ ተክለ፡ ኢየሱስ፡ ከርቤ፡ ወተክለ፡ ኢየሱስ፡ አበሜ፨
- ከመ፡ ትባርከነ፡ በመስቀልከ፡ ሮሜ፨
- ለሕዝብከ፡ ሰብአ፡ ሰሎሜ፨