መልክአ፡ ሚካኤል፡
Malkəʾa Mikāʾel
Image of Michael
-
- ሰላም፡ ለሢመትከ፡ እምነ፡ መልዕልት፡ መልዕልተ፨
- ወእምነ፡ ነፋስ፡ ወነድ፡ ተፈጥሮትከ፡ ተከሥተ፨
- የዋሀ፡ ልቡና፡ ቅዱስ፡ ሚካኤል፡ ዘኢትፈቱ፡ ትዕቢተ፨
- ለዘለብሰ፡ ትዕቢተ፡ አውረድኮ፡ መትሕተ፨
- ወለዕርቃኖ፡ መጦከ፡ ሥርጋዌ፡ ጽልመተ፨
-
- ሰላም፡ ለዝክረ፡ ስምከ፡ ብሂለ፡ ዕጹብ፡ ወመድምም፨
- ከመ፡ ብሂሎቱ፡ ፈከረ፡ ልሳነ፡ ሄኖክ፡ እምቅድም፨
- ቅዱስ፡ ሚካኤል፡ ክቡር፡ ዘዲበ፡ ኀይላት፡ ሥዩም፨
- ይትከዐው፡ ውስተ፡ አፉየ፡ ወይነ፡ ቃልከ፡ ጥዑም፨
- ከመ፡ ጽምዐ፡ ጕርዔየ፡ ያርዊ፡ ዜናከ፡ አዳም፨
-
- ሰላም፡ ሰላም፡ ለመልክእከ፡ ዘተንዕደ፨
- አፈ፡ መላእክት፡ ወሰብእ፡ በጊዜ፡ ሰበከ፡ ወልደ፨
- እስከ፡ ምጽንዐት፡ ኃምስ፡ እስመ፡ ተለውከ፡ ዋሕደ፨
- አርእየነ፡ ቅዱስ፡ ሚካኤል፡ ገጸከ፡ ብዑደ፨
- ከመ፡ ንንግር፡ ለትውልድ፡ ይእዜ፡ ገሀደ፨
-
- ባርኮት፡ ይደሉ፡ ለማርያም፡ እግዝእተ፡ ሰብእ፡ ወመላእክት፨
- ወምክሐ፡ ኵሎን፡ አንስት፨
- ወስብሐት፡ ካዕበ፡ ለንጽሐ፡ ሥጋሃ፡ ቅድስት፨
- ለድንግልናሃ፡ ክልኤቲ፡ ዘኢሰገደ፡ በትፍሥሕት፨
- በሰይፈ፡ ቅዱስ፡ ሚካኤል፡ ይትገዘም፡ ወይጥፋዕ፡ በሞት፨
-
- ለአብ፡ ስብሐት፡ ወለወልድ፡ አኰቴት፨
- ወለመንፈስ፡ ቅዱስ፡ ባርኮት፨
- ግናይ፡ ወሰጊድ፡ በኢቡዓዴ፡ በጽምረት፨
- ይደሉ፡ ለሥላሴ፡ ዘአልቦ፡ ኅልፈት፨
- በዘቦቱ፡ ነሐዩ፡ እምዳግም፡ ሞት፨