መልክአ፡ መስቀል፡ ኃምስ፡
Malkǝʾa Masqal Ḫāmǝs
Fifth Image of the Cross
-
- ሰላም፡ ለዝክረ፡ ስምከ፡ ዘመልዕልተ፡ ኵሉ፡ ቅዱስ፨
- በሰማይ፡ ወበምድር፡ በባሕር፡ ወበየብስ፨
- ስቁለ፡ መስቀል፡ እግዚእየ፡ ቅዳሴ፡ ሥጋ፡ ወነፍስ፨
- በመስቀልከ፡ ዘተሰፍሐ፡ ደመ፡ ሕዋሳቲከ፡ ልብስ፨
- መንጦላዕተ፡ ምሕረት፡ ይኩነኒ፡ ለብእሲ፡ ጽኑስ፨
-
- ሰላም፡ ለሥዕርተ፡ ርእስከ፡ በደመ፡ ተኰርዖ፡ ዘተጠብለለ፨
- ወለርእስከ፡ ዘጾረ፡ ሥርግወ፡ አስዋክ፡ አክሊለ፨
- አምላከ፡ ርኅራኄ፡ ክርስቶስ፡ ዘኢተአምር፡ በቀለ፨
- ቤዛ፡ ይኩነኒ፡ መስቀልከ፡ ወይጸግወኒ፡ ኀይለ፨
- እማኦ፡ ለፀርየ፡ ዘይፈቅድ፡ ሀጕለ፨
-
- ሰላም፡ ለዕርገትከ፡ ኀበ፡ አቡከ፡ ዘሀሎ፨
- እንተ፡ ኢያውረድከ፡ ሥጋ፡ ነሢአከ፡ ለተሣህሎ፨
- ወሃቤ፡ ሕይወት፡ ክርስቶስ፡ ለትሑት፡ ዘታሌዕሎ፨
- ከመ፡ ተለዐልኮ፡ አዕረገ፡ ለሕማምከ፡ መስቀሎ፨
- ውስተ፡ ደብረ፡ ከርቤ፡ ቅድስት፡ ዘትቄድስ፡ ኵሎ፨
-
- ሚዕፀብ፡ እግዝእትየ፡ ብዝኀ፡ ሐዘንኪ፡ በጊዜሁ፨
- ሶበ፡ ነጸርኪ፡ ስቁለ፡ ወዕሩቀ፡ ለወልድኪ፡ ሕዋሳቲሁ፨
- ወድኅረ፡ ሞቱ፡ ክብርት፡ ዘረገዝዎ፡ ገቦሁ፨
- ተመነይኩ፡ ሞተ፡ ወመቃብረ፡ ወተገንዞተ፡ ከማሁ፨
- እስመ፡ ለሕማሙ፡ አምሳለ፡ ኢረከብኪ፡ ናሁ፨
-
- ስብሐት፡ ለከ፡ አምላኪየ፡ በኍልቈ፡ ብዙኀ፡ አርምሞትከ፨
- ስብሐት፡ ለከ፡ አምላኪየ፡ በኍልቈ፡ ብዙኀ፡ ትሕትናከ፨
- ስብሐት፡ ለከ፡ አምላኪየ፡ በኍልቈ፡ ብዙኀ፡ ተራኅርኆትከ፨
- ወእንዘ፡ እኩያን፡ አይሁድ፡ ያፈድፍዱ፡ ሣቅዮትከ፨
- ከመ፡ ለዓለም፡ ኢያጥፍዕዎ፡ መላእክት፡ በኂርትከ፡ ከላእከ፨