መልክአ፡ ሠለስቱ፡ ደቂቅ፡
Malkəʾa Śallastu Daqiq
Image of the Three Youths
-
- ከመ፡ እወጥን፡ ወእፈጽም፡ በስመ፡ ሥላሴ፡ ዋሕድ፨
- ነገረ፡ ሠለስቱ፡ ደቂቅ፡ ዘተኰነኑ፡ በዐውድ፨
- አናንያ፡ ወአዛርያ፡ ወሚሳኤል፡ ውሉድ፨
- ይባርኩ፡ ዲበ፡ ርእስየ፡ በበረከተ፡ ቃል፡ ወእድ፨
- ጻድቃን፡ ወሰማዕት፡ ቡሩካን፡ ነገድ፨
-
- ሰላም፡ ለፅንሰትክሙ፡ በዘርአ፡ ቡሩክ፡ ኢዮአቄም፨
- ወለልደትክሙ፡ ሰላም፡ እማሕፀነ፡ ቅድስት፡ እም፨
- አናንያ፡ ወአዛርያ፡ ወሚሳኤል፡ ዘደም፨
- ይባርኩ፡ ውስተ፡ አፉየ፡ ለውዳሴክሙ፡ ዮም፨
- ኢየሱስ፡ ክርስቶስ፡ ወድንግል፡ ማርያም፨
-
- ሰላም፡ ለዝክረ፡ ስምክሙ፡ ዘተጸውዐ፡ በኅሬ፨
- እምአፈ፡ ነቢያት፡ ቀደምት፡ ካህናተ፡ ቀዳሚ፡ ድብታሬ፨
- አናንያ፡ ወአዛርያ፡ ወሚሳኤል፡ ሰብአ፡ ዝማሬ፨
- ጸግዉኒ፡ ዐይነ፡ ልባዌ፡ ዘኢይረክቦ፡ ፍካሬ፨
- ከመ፡ ገጸ፡ ነገር፡ እርአይ፡ ዘአልቦ፡ ስዋሬ፨
-
- ሰላም፡ ለግንዘተ፡ ሥጋክሙ፡ በሥርዓተ፡ አበው፡ ዘተገንዘ፨
- ወለመቃብሪክሙ፡ ሰላም፡ መንገለ፡ ፈጣሪ፡ አዘዘ፨
- አናንያ፡ ወአዛርያ፡ ወሚሳኤል፡ ሐዋዝ፨
- በመልክእክሙ፡ ለዘግብረ፡ ጸሎት፡ አኀዘ፨
- ረስይዎ፡ ይኩን፡ እምጌጋይ፡ ግዑዘ፨
-
- ጸሪቀ፡ መበለት፡ ቅድመ፡ ከመ፡ ተወክፈ፡ ክርስቶስ፨
- እመባአ፡ ብሩር፡ ወወርቅ፡ ዘነገሥተ፡ ሜዶን፡ ወፋርስ፨
- ተወከፉ፡ ዘንተ፡ ከማሁ፡ ደቂቀ፡ ኢዮአቄም፡ ንጉሥ፨
- ወአንብሩ፡ ዲበ፡ ርእስየ፡ አክሊላተ፡ ሕይወት፡ ኀምስ፨
- አመ፡ ይሔውጻ፡ በግብት፡ ቃለ፡ ሞት፡ ለነፍስ፨