መልክአ፡ ሠለስቱ፡ ምእት፡ ዐሠርቱ፡ ወሰማንቱ፡ ርቱዓነ፡ ሃይማኖት፡
Malkəʾa Śalastu Məʾt ʿAśśartu wa-Samāntu Rətuʿāna Hāymānot
Image of the Three-Hundred and Eighteen Orthodox
-
- ለወልደ፡ ማርያም፡ ድንግል፡ እለ፡ ኮንዎ፡ ማኅበራነ፨
- ቃለ፡ ሃይማኖት፡ ይስብኩ፡ እንተ፡ ትመርሕ፡ የማነ፨
- ሠለስቱ፡ ምእት፡ ዐሠርቱ፡ ወሰመንቱ፡ አበዊነ፨
- በሰይፈ፡ ግዘት፡ መተሩ፡ ዕልዋነ፨
- በቀስታመ፡ መስቀል፡ አድከሙ፡ ፀሮሙ፡ ሰይጣነ፨
-
- ሰላም፡ ለሃይማኖትክሙ፡ መስተፍሥሔ፡ ዓዸም፡ እንግዳ፨
- እምነ፡ ጸቃውዕ፡ ጥዑም፡ ወእምነ፡ ሐሊብ፡ ጸዐዳ፨
- ሠለስቱ፡ ምእት፡ አናቅጸ፡ ዐምዳ፡ ወድዳ፨
- ለቤቴል፡ ዘያዕቆብ፡ ሃይማኖተ፡ ድንግል፡ ወወልዳ፨
- እንተ፡ በዕሪና፡ ተተክሉ፡ ሥላሴ፡ አዕማዳ፨
-
- ሰላም፡ ለዝክረ፡ ስምክሙ፡ ዘተወደሰ፡ ብዙኀ፨
- በዐውደ፡ ቈስጠንጢኖስ፡ በኵር፡ ዘፍትሐ፡ ሃይማኖት፡ ፈትሐ፨
- ሠለስቱ፡ ምእት፡ ዐሠርቱ፡ ወሰመንቱ፡ ዘሮሐ፨
- አመ፡ ፱ለኅዳር፡ ዘወሰንክሙ፡ ንጹሐ፨
- ጸሎተ፡ ሃይማኖት፡ ዘሊቅ፡ አትናቴዎስ፡ ሎሐ፨
-
- ሰላም፡ ለመቃብሪክሙ፡ ዘየዐውዶ፡ ብርሃኑ፨
- ለዘእሙታን፡ ተንሥአ፡ በመለኮታዊ፡ ሥልጣኑ፨
- ሠለስቱ፡ ምእት፡ ዐሠርቱ፡ ወሰመንቱ፡ ላእካኑ፨
- ለዘዐርገ፡ ከመ፡ ያለቡ፡ ዕርገተ፡ ንጹሓን፡ ጻድቃኑ፨
- እለ፡ ይቤሎሙ፡ ንዑ፡ ይቁሙ፡ በይምኑ፨
-
- አምኃ፡ ድርሳን፡ ወገድል፡ ለመልክእክሙ፡ ጸሐፍኩ፨
- እንዘ፡ በበ፡ ክፍሉ፡ እከፍል፡ ወእዌስክ፡ በበ፡ ተውሳኩ፨
- ሠለስቱ፡ ምእት፡ ለክብርክሙ፡ ሰገድኩ፨
- ተወከፉኒ፡ ማሕሌትየ፡ መሥዋዕተ፡ ጽባሑ፡ ወሰርኩ፨
- ዲበ፡ ጠረጴዛ፡ ሐመረ፡ ኖኅ፡ ዘአነ፡ አቅረብኩ፨
-
- ሰላም፡ ለክሙ፡ ሠለስቱ፡ ምእት፡ ዐሠርቱ፡ ወሰመንቱ፡ ዘኒቅያ፨
- ተፍጻሜተ፡ ሰማዕት፡ ጴጥሮስ፡ ባስልዮስ፡ ዘቂሣርያ፨
- ዮናክንዲኖስ፡ ዘሮሜ፡ ጎርጎርዮስ፡ ዘአርማንያ፨
- እለእስክንድሮስ፡ ሊቅ፡ ዘጉባኤ፡ አትናቴዎስ፡ ሐዋርያ፨
- ያዕቆብ፡ ዘንጽቢን፡ ኤፍሬም፡ ዘሶርያ፨