መልክአ፡ ማርቆስ፡
Malkəʾa Mārqos
Image of Mark
-
- እጼውዐከ፡ በተአምኖ፡ ወእስእለከ፡ በተማሕፅኖ፨
- ክሳደ፡ ልብየ፡ በአጽንኖ፨
- ማርቆስ፡ አቡየ፡ ለእግዚአብሔር፡ አምላክ፡ አድኅኖ፨
- በሎ፡ በእንቲአየ፡ በምሕረትከ፡ ክድኖ፨
- ወሣህልከ፡ ወልታ፡ ጽድቅ፡ ይኩኖ፨
-
- ሰላም፡ ለፅንሰትከ፡ ወለልደትከ፡ ቡሩክ፨
- በብስራተ፡ ቅዱስ፡ መልአክ፨
- ሰባኬ፡ ወንጌል፡ ማርቆስ፡ ሐዋርያ፡ ክርስቶስ፡ አምላክ፨
- እንዘ፡ ቃለ፡ ወንጌል፡ ትዜኑ፡ እምጊዜ፡ ጽባሕ፡ ወሰርክ፨
- ላዕለ፡ ጣዖታት፡ ዘግብጽ፡ ተፈነወ፡ ሀውክ፨
-
- ሰላም፡ ለዝክረ፡ ስምከ፡ ዘተጸውዐ፡ ቀዲሙ፨
- ለወልደ፡ መካን፡ በስሙ፨
- ማርቆስ፡ ሥዩም፡ ለእግዚአብሔር፡ ካህነ፡ አርያሙ፨
- ኵሎሙ፡ አባላትየ፡ አመ፡ በጌጋይ፡ ሐሙ፨
- ለአድኅኖ፡ ዚአየ፡ ዘልፈ፡ በጸሎት፡ ጻሙ፨
-
- ሰላም፡ ለመቃብሪከ፡ ዘሀሎ፡ ውስቴቱ፨
- ሥጋ፡ ዚአከ፡ ንጹሕ፡ እንተ፡ ኀጢአት፡ አልቦቱ፨
- ገባሬ፡ ተኣምር፡ ማርቆስ፡ ፈዋሴ፡ ድዉያን፡ በንፍሐቱ፨
- ከመ፡ ይእትት፡ እምቅድሜየ፡ ለአርዌ፡ ዐመፃ፡ መሥገርቱ፨
- ብርሃነከ፡ ፀሓየ፡ ግብጽ፡ በገጽየ፡ አኅቱ፨
-
- ተወኪፈከ፡ ዘንተ፡ አምኃየ፡ ዘአቅረብኩ፡ በአስተሐምሞ፨
- ለመልክእከ፡ ሰላሞ፨
- ማርቆስ፡ ባሕርይ፡ ማርቆስ፡ አበሞ፨
- ኣአኵቶ፡ ለአምላክከ፡ ወአሌዕል፡ ስሞ፨
- እስመ፡ በኂሩቱ፡ ብዙኅ፡ ክህልኩ፡ ፈጽሞ፨