መልክአ፡ ሐዋርያ፡ ክርስቶስ፡ ዘደብረ፡ በንኮል፡
Malkəʾa Ḥawārǝyā Krǝstos za-Dabra Bankol
Image of Ḥawārǝyā Krǝstos of Dabra Bankol
-
- ሰላም፡ ለክሙ፡ መዋእያነ፡ ዓለም፡ መጽዕር፨
- ዘድንግል፡ ክቡር፡ ወሐዋርያ፡ ክርስቶስ፡ መምህር፨
- ወሰላም፡ ካዕበ፡ ለዘዚአክሙ፡ ማኅበር፨
- እለ፡ አምሠጥዎ፡ ለሞተ፡ ፍጡራን፡ መሪር፨
- በብዙኅ፡ ገድል፡ ወመንክር፡ ምስጢር፨
-
- ተላዌ፡ ኢየሱስ፡ ክርስቶስ፡ ዘበሰማያት፡ ንጉሥ፨
- ወላእከ፡ ማርያም፡ ድንግል፡ መድኃኒተ፡ ኵሉ፡ ዘነፍስ፨
- ሐዋርያ፡ ክርስቶስ፡ ካህን፡ ሰባኬ፡ ወንጌል፡ ሐዲስ፨
- ዕቀበነ፡ ለደቂቅከ፡ እምቀትለ፡ መስቴማ፡ ጽዉስ፨
- ወአንጽሐነ፡ እምስዕበት፡ ወርኵስ፨
-
- በስመ፡ አብ፡ ወወልድ፡ ወመንፈስ፡ ቅዱስ፡ ሥላሴ፨
- ብሂልየ፡ ወጠንኩ፡ ዘመልክእከ፡ ውዳሴ፨
- ሐዋርያ፡ ክርስቶስ፡ ኤልያስ፡ ብሩሀ፡ ገጽ፡ ከመ፡ ሙሴ፨
- አብሐነ፡ ለአግብርቲከ፡ በርሱማሃ፡ ፈላሴ፨
- አርእስተ፡ አቃርብት፡ ንኪድ፡ ወንቀጥቅጥ፡ ከይሴ፨
-
- ሰላም፡ ለዝክረ፡ ስምከ፡ ኀበ፡ ዐምደ፡ ወርቅ፡ ጽሩይ፨
- ዘጸሐፍዎ፡ ቅድመ፡ መላእክተ፡ ንጉሥ፡ ዐቢይ፨
- ሐዋርያ፡ ክርስቶስ፡ ጽዱል፡ እምዕንቈ፡ መረግድ፡ ኅሩይ፨
- አብርህ፡ ምድረ፡ ኅሊናየ፡ በጸሎትከ፡ ፀሓይ፨
- እስመ፡ ተገልበበ፡ በጽልመት፡ ጌጋይ፨
-
- ሰላም፡ ለአእናፊከ፡ እለ፡ አጼነዋ፡ ዕጣነ፨
- ወለከናፍሪከ፡ ሰላም፡ እለ፡ ይመስላ፡ ሮማነ፨
- ሐዋርያ፡ ክርስቶስ፡ ወልዱ፡ ለመድኃኒነ፡ እግዚእ፡ አቡነ፨
- ኀበ፡ ማርያም፡ እግዝእተ፡ ኵሉ፡ አዘክር፡ ኪያነ፨
- ጸሎታ፡ ወበረከታ፡ የሀሉ፡ ምስሌነ፨
-
- ሰላም፡ ለዕርገትከ፡ በሐዋዝ፡ ዜማ፨
- ኀበ፡ ምድር፡ ጽዕዱት፡ ዘብሔረ፡ ሕያዋን፡ ስማ፨
- ሐዋርያ፡ ክርስቶስ፡ ሕያው፡ ከመ፡ ሄኖክ፡ ወገሪማ፨
- አባ፡ አባ፡ ምሉአ፡ ሞገስ፡ ወግርማ፨
- በጸሎትከ፡ ሰደድኮ፡ ለመዊት፡ መስቴማ፨
-
- ለዝንቱ፡ ቃለ፡ ማሕሌት፡ ወለዝንቱ፡ ድርሳን፨
- ለዘያነብቦ፡ በቃል፡ ወለዘይሰምዖ፡ በእዝን፨
- እግዚአብሔር፡ ይዕቀቦ፡ በዘሐዋርያ፡ ክርስቶስ፡ ኪዳን፨
- ዳዕሙ፡ ዘያሰትቶ፡ በልቡናሁ፡ ምኑን፨
- ከመ፡ ዳታን፡ ወአቤሮን፡ ይትኰነን፡ በደይን፨
-
- ሰላም፡ ለከ፡ ቅድመ፡ መንበረ፡ አብ፡ ወወልድ፡ ወመንፈስ፡ ቅዱስ፡ ሥላሴ፨
- ዘተዐጥን፡ ወትረ፡ በውዳሴ፨
- ሐዋርያ፡ ክርስቶስ፡ ምዑዘ፡ ቅዳሴ፨
-
- ሰላም፡ ለከ፡ በኪዳንከ፡ ጽኑዕ፡ ወሕማምከ፡ ትሩፍ፨
- አባ፡ አባ፡ ስፉሐ፡ ክንፍ፨
- አኅልፈነ፡ ለነ፡ እምጸባብ፡ ምኅላፍ፨
- ዘሕጽርት፡ በእሳት፡ ወጽፍድ፨