መልክአ፡ ፍሬ፡ ካህን፡ ዘሐይዳ፡
Malkəʾa Fǝre Kāhǝn za-Ḥaydā
Image of Fǝre Kāhǝn of Ḥaydā
-
- ኦክርስቶስ፡ ዘኢታዐርብ፡ ፀሓይ፨
- በእንተ፡ ማርያም፡ እምከ፡ ዳግሚት፡ ሰማይ፨
- ድርሳነ፡ መልክኡ፡ እትናገር፡ ለፍሬ፡ ካህን፡ ኅሩይ፨
- አስተየኒ፡ ወይነ፡ ልቡና፡ በጽዋዐ፡ ሙሴ፡ ራእይ፨
- በከመ፡ አስተዮ፡ ዑራኤል፡ ለዕዝራ፡ ነቢይ፨
-
- ሰላም፡ ለዝክረ፡ ስምከ፡ በዓለ፡ ቀዋሚ፡ ኪዳን፨
- ወለሥዕርትከ፡ ሥርው፡ በጸጕረ፡ ብናሴ፡ ብርሃን፨
- ፍሬ፡ ካህን፡ አቡየ፡ መትልወ፡ ቶማስ፡ ካህን፨
- ኀቤየ፡ ትምጻእ፡ ለሐውጾ፡ ምስለ፡ ፊቅጦር፡ ምእመን፨
- ኢያዕቅፍከ፡ ውስተ፡ ፍና፡ ጌጋይየ፡ ዕብን፨
-
- ሰላም፡ ለግንዘተ፡ ሥጋከ፡ በልብስ፡ ሐዲስ፨
- ወለመቃብሪከ፡ ዓዲ፡ ደብረ፡ ማርያም፡ መቅደስ፨
- ፍሬ፡ ካህን፡ አቡየ፡ ንጹሐ፡ ሥጋ፡ ወመንፈስ፨
- ለኤልሳዕ፡ ከመ፡ ወሀቦ፡ ሐሜሌተ፡ ርእሱ፡ ኤልያስ፨
- ሐሜሌተከ፡ ሀበኒ፡ ለብእሲ፡ ፅኑስ፨
-
- መጠነ፡ አቅረብኩ፡ ዮም፡ ሰላመ፡ ሥላሴ፡ ማሕሌትየ፨
- በእሳተ፡ ፍቅርከ፡ አባ፡ እስመ፡ ሣዕረ፡ ልብየ፡ ውዕየ፨
- ፍሬ፡ ካህን፡ ለከ፡ ትብለከ፡ ነፍስየ፨
- አንተ፡ ዕሥየኒ፡ ዕሤተ፡ ሠናየ፨
- ዘእዝን፡ ኢሰምዐ፡ ወዘዐይን፡ ኢርእየ፨
-
- ሰላም፡ ለበአትከ፡ ውስተ፡ ደብረ፡ ማርያም፡ ዘሐይዳ፨
- በዕለተ፡ ዘሠራዕከ፡ ማዕዳ፨
- ፍሬ፡ ካህን፡ አባ፡ ለጥበብ፡ አበ፡ ወልዳ፨
- ፍሬ፡ በረከት፡ ዘሐጠብከ፡ በውስተ፡ ዐውዳ፨
- ሴሰይኮሙ፡ ለአበው፡ በበዳ፨
-
- ሰላም፡ ለበአትከ፡ እምኢየሩሳሌም፡ ለአምጽኦ፡ መጻሕፍት፡ ወንዋየ፡ ቅዱሳት፨
- ምስለ፡ ወልደ፡ መኰንን፡ ዘአወፈየከ፡ ርስተ፡ ጕልት፨
- ፍሬ፡ ካህን፡ አባ፡ መክብበ፡ መነኮሳት፨
- አባ፡ አባ፡ አምሳሊሆሙ፡ ለመላእክት፨
- ዕቀበነ፡ በኵሉ፡ ጊዜ፡ ወበኵሉ፡ ሰዓት፨