መልክአ፡ ዮሐንስ፡ ዘውራ፡
Malkəʾa Yoḥannǝs za-Wǝrrā
Image of Yoḥannǝs of Wǝrrā
-
- ሰላም፡ ለዝክረ፡ ስምከ፡ ዘትርጓሜሁ፡ ፍሥሓ፨
- ወዘይናዝዝ፡ ኵሎ፡ በዝየ፡ ወክሐ፨
- ዮሐንስ፡ ዘኮንከ፡ እምርስሐተ፡ ዓለም፡ ንጹሐ፨
- ጸሎትከ፡ ቅድመ፡ ፈጣሪ፡ ትኩነኒ፡ መርሐ፨
- እስመ፡ ጊዜ፡ ሞትየ፡ እፈርህ፡ ብዙኀ፨
-
- ሰላም፡ ለቃልከ፡ እምድምፀ፡ መሰንቆ፡ ወዕንዚራ፨
- ዘጥዑም፡ ዜማሁ፡ ወጉህናሁ፡ ነከራ፨
- ንጹሐ፡ ምግባር፡ ዮሐንስ፡ ርእሰ፡ ምኔተ፡ ውራ፨
- ይጼልሉ፡ ክነፊሆሙ፡ ትጉሃነ፡ ሰማይ፡ ሐራ፨
- ላዕለ፡ ምኔትከ፡ ዘባቲ፡ መከራ፨
-
- ሰላም፡ ለመቃብሪከ፡ መዝገበ፡ ባሕርይ፡ ዘቦቱ፨
- ባሕርይሰ፡ በድነ፡ ሥጋከ፡ ውእቱ፨
- ዮሐንስ፡ ዜናዊ፡ ምስጢረ፡ ፊደላት፡ ክልኤቱ፨
- አንበረኒ፡ በየማንከ፡ ጊዜ፡ ፀአተ፡ ነፍስ፡ እምዝንቱ፨
- እስመ፡ ንብረተዝ፡ ዓለም፡ የኀልፍ፡ በከንቱ፨
-
- አምኃ፡ ሰላም፡ አቅረብኩ፡ ለፍልሰተ፡ ዐፅሙ፡ ወርእሱ፨
- ሜላተ፡ ብርሃን፡ ንጹሐ፡ እንዘ፡ ይለብሱ፨
- እምከርሠ፡ መቃብር፡ እሙቅ፡ ውስተ፡ ቤተ፡ ልዑል፡ መቅደሱ፨
- በኪዳንኪ፡ ማርያም፡ ሕይወተ፡ ሕሙማን፡ ኢያሱ፨
- በመንግሥተ፡ ሰማይ፡ አዕረፈት፡ ለዮሐንስ፡ ነፍሱ፨
-
- ሰላም፡ ለከ፡ ዮሐንስ፡ መስተጋድል፨
- ንጹሕ፡ ወድንግል፨
- ኀበ፡ እግዚእከ፡ አምላክ፡ ሰአሌ፡ ምሕረት፡ ወሣህል፨
- ጸሊ፡ ለደቂቅከ፡ ወባልሐነ፡ እምሀጕል፨
- እስመ፡ ጸሎትከ፡ አድኅኖ፡ ዘትክል፨
-
- ሰላም፡ ለክሙ፡ ለዮሐንስ፡ አዕማዱ፨
- ለለ፡ አሐዱ፡ አሐዱ፨
- ባርኩነ፡ ዘልፈ፡ እንዘ፡ ትሰግዱ፨
- አብርሃም፡ ከመ፡ ባረኮ፡ ለይስሐቅ፡ ወልዱ፨
- እስመ፡ ቡራኬ፡ ለመምህር፡ ልማዱ፨