መልክአ፡ ዐሥራተ፡ ወልድ፡ ዘዙርዙር፡
Malkəʾa ʿAśrāta Wald za-Zurzur
Image of ʿAśrāta Wald of Zurzur
-
- ሰላም፡ ለተንሥኦትከ፡ በቃለ፡ ፈጣሪ፡ ልዑል፨
- ከመ፡ ወሬዛ፡ ግሩም፡ እንበለ፡ ሙስና፡ ወሀጕል፨
- ዐሥራተ፡ ወልድ፡ አቡነ፡ ጽሙደ፡ ጸሎት፡ ወገድል፨
- አሰሰልከ፡ ጋዕዝ፡ እምውሉድከ፡ በዘኢይትኄሰው፡ ቃል፨
- ድልዋኒክሙ፡ ንበሩ፡ እንዘ፡ ትብል፨
-
- ሰላም፡ ለፅንሰትከ፡ ወለልደትከ፡ መንክር፨
- እምጽጌ፡ ማርያም፡ ቡርክት፡ ወእምጻማ፡ ክርስቶስ፡ ክቡር፨
- ዐሥራተ፡ ወልድ፡ እንጦንስ፡ ተላዌ፡ አሠሩ፡ ለኄር፨
- ናስተበፅዕ፡ ዜና፡ ገድልከ፡ ምስለ፡ ሊቃናት፡ በኅብር፨
- ውስተ፡ ገዳምከ፡ ቅድስት፡ ዘስማ፡ ዙርዙር፨
-
- ሰላም፡ ለዝክረ፡ ስምከ፡ ዘተጸውዐ፡ በኀይሉ፨
- ወለሥዕርትከ፡ ሰላም፡ ለፈትለ፡ ሜላት፡ አምሳሉ፨
- ዐሥራተ፡ ወልድ፡ መምህር፡ ለወልደ፡ እግዚአብሔር፡ ወንጌሉ፨
- እጽሕፍ፡ ዜና፡ ዝክርከ፡ ማእከለ፡ ካህናት፡ እሉ፨
- አምጣነ፡ ዝክርከ፡ ይትዐወቅ፡ በኵሉ፨
-
- ሰላም፡ ለመቃብሪከ፡ ማእከለ፡ አድባር፡ ወሐቅል፨
- እለ፡ በውስቴታ፡ ነበሩ፡ ማኅበረ፡ ቅዱሳን፡ አህባል፨
- ዐሥራተ፡ ወልድ፡ አቡነ፡ ዘቤተ፡ ክርስቲያን፡ አክሊል፨
- ኮነ፡ ምስማከከ፡ እንተ፡ አብ፡ ወንጌል፨
- ወኮነ፡ መርጉዘከ፡ እንተ፡ ወልድ፡ መስቀል፨
-
- ናሁ፡ አቅረብኩ፡ ማሕሌትየ፡ ለመልክእከ፡ በእማኄ፨
- ጸሓፌ፡ መልክእከ፡ አነ፡ እንዘ፡ ሶበ፡ እብል፡ ኤሎሄ፨
- ዐሥራተ፡ ወልድ፡ ክቡር፡ ዘመልክእከ፡ ሡራሄ፨
- እስመ፡ ከመ፡ እጽሐፍ፡ አባሕከኒ፡ ዜና፡ ዝክርከ፡ ስባሔ፨
- ዘይትነገር፡ ለከ፡ በመካን፡ ኵለሄ፨
-
- ተወከፍ፡ ዘንተ፡ አምኃ፡ መልክእከ፡ በተወክሎ፨
- እንዘ፡ ኣቄርብ፡ ስብሐተ፡ ወብዙኀ፡ ተማኅልሎ፨
- ዐሥራተ፡ ወልድ፡ ኤልያስ፡ ነቢየ፡ ቴስብያ፡ ወሴሎ፨
- አርአየኒ፡ እስኩ፡ በመጽሔተ፡ አእምሮት፡ ኵሎ፨
- ከመ፡ ያርኢ፡ እግዚእየ፡ ሥልጣኖ፡ ወኀይሎ፨
-
- ሰላም፡ ለበአትከ፡ ዘትሰመይ፡ ጉርብ፨
- እንዘ፡ በውስቴታ፡ ትጼሊ፡ ስብሐተ፡ ማርያም፡ ጠባብ፨
- ዐሥራተ፡ ወልድ፡ ዮናስ፡ ሰባኬ፡ ንስሓ፡ ለሕዝብ፨
- ያንቅሐኒ፡ እምንዋመ፡ ሀኬት፡ ኀይለ፡ ጸጋከ፡ ዕጹብ፨
- ከመ፡ አንቅሖ፡ ጳውሎስ፡ ለቲቶ፡ ስኩብ፨