መልክአ፡ እደ፡ ክርስቶስ፡ ዘደብረ፡ መጒና፡
Malkəʾa ʾƎda Krǝstos za-Dabra Magʷinā
Image of ʾƎda Krǝstos of Dabra Magʷinā
-
- ሰላም፡ ለዕለተ፡ ፅንስከ፡ እንተ፡ ባረካ፡ ፈድፉደ፨
- እምነ፡ ዕለታት፡ ፈጣሪ፡ ከመ፡ ባረከ፡ እሑድ፨
- እደ፡ ክርስቶስ፡ ያዕቆብ፡ ኀበ፡ ዲበ፡ በትሩ፡ ሰገደ፨
- ባርክ፡ ባርክ፡ ውሉደከ፡ እንዘ፡ ያስተኅልፍ፡ እደ፨
- አርአያ፡ ውስተ፡ ግብጽ፡ ባረከ፡ ዘወልዱ፡ ውሉደ፨
-
- ሰላም፡ ለልደትከ፡ እምበረከተ፡ እድ፡ ማሕፀን፨
- አእላፈ፡ አእላፋት፡ ትለድ፡ ከመ፡ ወለደት፡ መካን፨
- እደ፡ ክርስቶስ፡ ነጋዲ፡ በዓለ፡ ሃይማኖት፡ ምናን፨
- በኅዳጥ፡ ምእመነ፡ እስመ፡ ኮንከ፡ ውስተ፡ ቤተ፡ እግዚእ፡ መድኅን፨
- ብአዲበ፡ ብዙኅ፡ ለሊከ፡ ምእመን፨
-
- ሰላም፡ ለዝክረ፡ ስምከ፡ አበ፡ ብዙኃን፡ ዘተጸውዐ፨
- በልሳነ፡ ሕዝብ፡ ዘውስጥ፡ ወበአፈ፡ አሕዛብ፡ ዘአፍአ፨
- ተክለ፡ ሃይማኖት፡ ኢዮብ፡ ሶበ፡ ኪያከ፡ ኃጥአ፨
- ይቤ፡ ሊተ፡ እደ፡ አምላክ፡ ወልደ፡ ባቍዐ፨
- እግዚአብሔር፡ ወሀበ፡ ወለሊሁ፡ ነሥአ፨
-
- ሰላም፡ ለአፉከ፡ አፈ፡ ጳውሎስ፡ ዐዋዲ፨
- ዘበሃይማኖት፡ አውገዘ፡ አርድእተ፡ መልአክ፡ ከሓዲ፨
- ተፈሥሐ፡ ብከ፡ አምኃ፡ ጊዮርጊስ፡ ምስለ፡ አብሳዲ፨
- ውስተ፡ ባሕር፡ መክሊተ፡ ለአርብሖ፡ እደ፡ ክርስቶስ፡ ነጋዲ፨
- እስመ፡ በጠቢብ፡ ወልድ፡ ይትፌሣሕ፡ ወላዲ፨
-
- ሰላም፡ ለፍልሰተ፡ ሥጋከ፡ በአፈ፡ ብፅዓን፡ ዘተበፅዐ፨
- እምፍልሰተ፡ ነቢይ፡ ኤልያስ፡ ዘመሥዋዕተ፡ ስብሐት፡ ሦዐ፨
- ኦእዱ፡ ለዘሥጋ፡ ድንግል፡ ነሥአ፨
- አባ፡ ሀበኒ፡ ለወልድከ፡ መስተስርየ፡ ጌጋይ፡ አንብዐ፨
- እስመ፡ ከመ፡ እብን፡ ጽኑዕ፡ ኅሊናየ፡ ጸንዐ፨
-
- አመ፡ እትወቱ፡ ለሥጋከ፡ እምሀገረ፡ ሕዝብ፡ ነኪር፨
- መካነ፡ ቅዱሳን፡ መጒና፡ ብአዓልተ፡ ሃይማኖት፡ ወፍቅር፨
- በትእዛዘ፡ ንጉሥ፡ ኢያሱ፡ ዘአዕማደ፡ ቤቱ፡ ብሩር፨
- እንዘይብሉ፡ ተቀበሉከ፡ ካህናተ፡ ሐዲስ፡ ምስጢር፨
- ይበዝኅ፡ ከመ፡ ዘግባ፡ ወይፈሪ፡ ከመ፡ በቀልት፡ ዕሤትከ፡ እደ፡ ኢየሱስ፡ በቅድመ፡ እግዚአብሔር፨
-
- ለንጉሠ፡ ነገሥት፡ ፍቅርከ፡ ለዘወሀብኩ፡ አምኃ፨
- እደ፡ ክርስቶስ፡ ሀበኒ፡ ፍዳ፡ ፍቅርየ፡ ፍሥሓ፨
- እስመ፡ ጻድቅ፡ ይሁብ፡ እንበይነ፡ ኅዳጥ፡ ብዙኀ፨
- ኃጥእሰ፡ ዘከማየ፡ ኢይፈዲ፡ ዘተለቅሐ፨
- ወውስተ፡ ፍትሕ፡ ኢያረትዕ፡ ፍትሐ፨