መልክአ፡ አውሳብዮስ፡ ዘሶርያ፡
Malkəʾa ʾAwsābyos za-Soryā
Image of Eusebius of Syria
-
- በስመ፡ አብ፡ ወወልድ፡ ወመንፈስ፡ ቅዱስ፡ ሥላሴ፨
- አኀዝኩ፡ እጽሐፍ፡ ሰላመ፡ መልክእከ፡ ምስለ፡ ውዳሴ፨
- ባሕቱ፡ ማኅለቅቶ፡ ከመ፡ እርአይ፡ እንበለ፡ ድምሳሴ፨
- አርሕቅ፡ እምየማንየ፡ ዘይትቃወመኒ፡ ብእሴ፨
- አውሳብዮስ፡ መዛግብተ፡ ዘኮንከ፡ ወራሴ፨
-
- ሰላም፡ ለዝክረ፡ ስምከ፡ መርስዔ፡ ሐዘን፡ ወትካዝ፨
- ወለሥዕርትከ፡ ሥሙር፡ ከመ፡ ዕፀ፡ በቀልት፡ ወአርዝ፨
- አውሳብዮስ፡ ኅሩይ፡ ንጹሐ፡ ምግባር፡ ወግዕዝ፨
- አጽንዖ፡ ለልሳንየ፡ በመንፈስ፡ ዐዚዝ፨
- ከመ፡ እወድስከ፡ በመዝሙር፡ ሐዋዝ፨
-
- ሰላም፡ ለዕርገትከ፡ በይባቤ፡ ኀይላት፡ ሰማየ፨
- መልክአ፡ ስብሐቲከ፡ ትርአይ፡ ዘዐይነ፡ ሥጋዌ፡ ኢርእየ፨
- አውሳብዮስ፡ እሞት፡ እስመ፡ ረዳኢ፡ አልብየ፨
- ንዑ፡ ንዑ፡ መንገሌየ፡ ለቤዝዎ፡ ኀጥእት፡ ነፍስየ፨
- ጊዮርጊስ፡ እግዚእየ፡ ወአንተ፡ እኁየ፨
-
- ሰላም፡ ለከ፡ አውሳብዮስ፡ ዘሶርያ፨
- እንተ፡ ኢርእየ፡ ዐይንከ፡ ለብእሲተ፡ ንጉሥ፡ ሥነ፡ ላህያ፨
- እስመ፡ በእንተዝ፡ ትትኰነን፡ በግዕዘ፡ ሰራዊ፡ ወሕገ፡ ጕሕልያ፨
- ታስተስሪ፡ ነፍሰ፡ ዚአከ፡ ቅድመ፡ ገጸ፡ አምላክ፡ ጸልያ፨
- ለነፍስየ፡ ኀጢአታ፡ ወኵሎ፡ ጌጋያ፨
-
- ሰላም፡ ለከ፡ ወልደ፡ መስፍን፡ መካሕ፡ በይነ፡ አፍቅሮቱ፡ ለቃል፨
- ዘባሕረ፡ ደመ፡ ስምዕ፡ ነገድከ፡ በሐመረ፡ ኀይል፨
- አውሳብዮስ፡ ኖትያ፡ ገድል፨
-
- ሰላም፡ ለከ፡ ማኅቶተ፡ ጸጋከ፡ አብርህ፡ ዲበ፡ ርእስየ፡ ተቅዋም፨
- አውሳብዮስ፡ ኄር፡ ላእከ፡ ሰላም፨
- ወዕርቃነ፡ ነፍስየ፡ ክድን፡ ኀይለ፡ አርያም፨
- ለገብርከ፡ ብእሲ፡ ድኩም፨