መልክአ፡ አብሳዲ፡ ዘደብረ፡ መጒና፡
Malkəʾa ʾAbsādi za-Dabra Magʷinā
Image of ʾAbsādi of Dabra Magʷinā
-
- ናሁ፡ ወጠንኩ፡ ውዳሴ፡ መልክእከ፡ ለጽሒፍ፨
- በስመ፡ እግዚአብሔር፡ ኅጡእ፡ እምገጸ፡ ውሳኔ፡ ወጽንፍ፨
- አብሳዲ፡ እንጦንስ፡ አበ፡ ብዙኃን፡ አእላፍ፨
- ሣህለ፡ ትንባሌከ፡ ወሰነ፡ ረድኤትከ፡ ትሩፍ፨
- ላዕላዐ፡ ልሳን፡ አፈ፡ ይኩነኒ፡ ለዘልፍ፨
-
- ሰላም፡ ለዝክረ፡ ስምከ፡ በሰሌዳ፡ መንፈስ፡ ልኩእ፨
- ወለሥዕርትከ፡ ጸሊም፡ ዕፍረተ፡ ቅዳሴ፡ ቅቡእ፨
- ብእሴ፡ ገዳም፡ አብሳዲ፡ ወቢጸ፡ መቃራ፡ ብፁዕ፨
- ዘተነዝኀ፡ እምልሳንከ፡ አዛበ፡ ዝማሬ፡ ባቍዕ፨
- ያንጽሐኒ፡ እምግማኔ፡ ለብእሲ፡ ኃጥእ፨
-
- ሰላም፡ ለግንዘተ፡ ሥጋከ፡ በአእዳወ፡ ሠላሳ፡ ካህናት፨
- ወሰላም፡ ካዕበ፡ ለመቃብሪከ፡ በአት፨
- ታቦተ፡ ቅዳሴ፡ አብሳዲ፡ ወሙዳየ፡ ንጹሕ፡ ጸሎት፨
- እምሐጸ፡ አርዌ፡ ወእምነዓዊ፡ መሥገርት፨
- ማኅበረነ፡ ዕቀብ፡ በኵሉ፡ ሰዓት፨
-
- ዘንተ፡ ንስቲተ፡ ማሕሌተ፡ ለአብናከ፡ ሰፋኒ፨
- በይነ፡ ዘአቅረብኩ፡ ለከ፡ ወልድከ፡ ተአማኒ፨
- ወእሳተ፡ ፍቅርከ፡ ልሁብ፡ እስመ፡ አውዐየኒ፨
- ኦአቡየ፡ አብሳዲ፡ መትለወ፡ ብፁዕ፡ አርሳኒ፨
- አባ፡ የማንከ፡ ትባርከኒ፡ አባ፡ ጸሎትከ፡ ትቀድሰኒ፨
-
- ኦእግዚኦ፡ አምላከ፡ ቅዱስ፡ አብሳዲ፨
- ወእግዚአ፡ ዮሐንስ፡ ቃለ፡ ዐዋዲ፨
- በእንተ፡ ቅንወ፡ ወልድከ፡ ወበእንተ፡ ማርያም፡ ወለተ፡ ሐዲ፨
- በብዝኀ፡ ምሕረትከ፡ ወበጸጋ፡ ሣህልከ፡ ዓዲ፨
- ዐስበ፡ ማሕሌትየ፡ ለገብርከ፡ ፍጡነ፡ ፍዲ፨