መልክአ፡ ተክለ፡ ሐዋርያት፡ ዘደብረ፡ ጽሞና፡
Malkəʾa Takla Ḥawārǝyāt za-Dabra Ṣəmmonā
Image of Takla Ḥawārǝyāt of Dabra Ṣəmmonā
-
- በስመ፡ እግዚአብሔር፡ አብ፡ ንትነሣእ፡ ወልዶ፡ ዘፈነወ፡ ለነ፨
- ወበስመ፡ እግዚአብሔር፡ ወልድ፡ ንዌጥን፡ ዘተሰብአ፡ በእንቲአነ፨
- ወበስመ፡ እግዚአብሔር፡ መንፈስ፡ ቅዱስ፡ ንጽሕፍ፡ ከመ፡ ይፈጽም፡ ጻሕቀነ፨
- ስብሐት፡ በሰማያት፡ ለዘፈጠረ፡ ጻድቃን፨
- ወሰላም፡ በምድር፡ ለዘፈተወነ፨
-
- ሰላም፡ ለፅንሰትከ፡ ዘአደንገጾ፡ ለማሪ፨
- ወለልደትከ፡ ሰላም፡ በይነ፡ ዘአፍቀሮ፡ ፈጣሪ፨
- ተክለ፡ ሐዋርያት፡ ብፁዕ፡ ለምሕሮ፡ አሚን፡ ሐዋሪ፨
- አስተብቍዕ፡ ኀበ፡ አምላክከ፡ ከመ፡ ኀጢአተነ፡ ያስተስሪ፨
- ወዘእንበሌሁሰ፡ ዘአልቦ፡ መሓሪ፨
-
- ሰላም፡ ለዝክረ፡ ስምከ፡ ከመ፡ ጥዑመ፡ ስም፡ መዐር፨
- ከመ፡ ሐሊብ፡ ዘእጐልት፡ ወከመ፡ ጽጌ፡ ሥሙር፨
- ተክለ፡ ሐዋርያት፡ ኀያል፡ ልዑከ፡ አምላክ፡ ክቡር፨
- ሱቀነ፡ ለደቂቅከ፡ እምቅንየተ፡ አርዌ፡ ነኪር፨
- ከመ፡ ኢይቅኒ፡ ኪያነ፡ በሕምዙ፡ መሪር፨
-
- ሰላም፡ ለክሳድከ፡ ልህኵተ፡ አምላክ፡ ፌማ፨
- ለዘአነቀ፡ ክብረ፡ ዘመላእክት፡ አስኬማ፨
- ወውእቱኒ፡ ተወክፈ፡ እምእደ፡ አባ፡ ዮሐንስ፡ ከማ፨
- ተክለ፡ ሐዋርያት፡ ጸጋከ፡ እንተ፡ ምሉእ፡ ግርማ፨
- ሰውረኒ፡ ዘልፈ፡ እምእኩይ፡ መስቴማ፨
-
- ሰላም፡ ለልብከ፡ መዝገበ፡ ርኅራኄ፡ ወልቡና፨
- ወመዝገበ፡ ሣህል፡ ወዳኅና፨
- ተክለ፡ ሐዋርያት፡ ኀያል፡ ዘንብረትከ፡ ጽሙና፨
- ጸሎትከ፡ ለፀርነ፡ ነበልባለ፡ እሳት፡ ከዊና፨
- እምውስተ፡ ገሀነም፡ ትደዮ፡ ወበሲኦል፡ ፍና፨
-
- ሰላም፡ እብል፡ ለበድነ፡ ሥጋከ፡ ዐዋዲ፨
- እንዘ፡ በሕይወቱ፡ ባረከ፡ ወእምድኅረ፡ አዕረፈ፡ ዓዲ፨
- ወአንበርዎ፡ በክብር፡ ኅሩያን፡ ውስተ፡ ድኂን፡ ወጋዲ፨
- ወይብራህ፡ በላዕሌነ፡ ብርሃነ፡ ጸጋከ፡ ነዳዲ፨
- ተክለ፡ ሐዋርያት፡ በርህ፡ ጽልመተ፡ ሰዳዲ፨
-
- አምኃ፡ ሰላም፡ ኣቄርብ፡ ለመልክእከ፡ ኵሉ፨
- እምዘተጋድሎትከ፡ አኮ፡ ወእምብዝኀ፡ ገድልከ፡ ቃሉ፨
- በአምጣነ፡ ንስቲት፡ ባሕቱ፡ ወበሕጹጽ፡ ፊደሉ፨
- ተክለ፡ ሐዋርያት፡ መሐረኒ፡ በእንተ፡ ልብየ፡ ኵሉ፨
- እስመ፡ ኅሊናየ፡ ወልብየ፡ ኪያከ፡ ተወከሉ፨
-
- አምኃ፡ ሰላም፡ ካዕበ፡ ለመልክእከ፡ ጽዱል፨
- አምጣነ፡ ናቄርብ፡ ሎቱ፡ በእደ፡ ልሳን፡ እንዘ፡ ንብል፨
- ተክለ፡ ሐዋርያት፡ ኅሩይ፡ ወሰባኬ፡ ወንጌል፨
- ወአንሶስዎትከ፡ ተባረኩ፡ አድባረ፡ ግብርማ፡ ወጎል፨
- ወብከ፡ ረከቡ፡ ፍሥሓ፡ ዘሣህል፨
-
- ሰላም፡ ለከ፡ ተክለ፡ ሐዋርያት፡ ብእሲ፡ ሰማያዊ፨
- ወመልአክ፡ ምድራዊ፡ መልአክ፡ ሰማያዊ፨
- ወብእሲ፡ ምድራዊ፡ ማእምር፡ ወለባዊ፨
- ነፍሳተ፡ ኃጥኣን፡ ፄዋዊ፡ ፄውወነ፡ አባ፡ እምተኵላ፡ ፀራዊ፨
-
- ሰላም፡ ለከ፡ ተክለ፡ ሐዋርያት፡ ክሡት፨
- በኀበ፡ መላእክት፡ ወዕዉቅ፡ በኀበ፡ ሰብእ፡ ወነገሥታት፨
- እንተ፡ ኀረየከ፡ ንጉሠ፡ ስብሐት፨
- ከመ፡ ትኩነነ፡ መራሔ፡ ፍኖት፡ አብአነ፡ ውስተ፡ ገነት፨