መልክአ፡ በርባራ፡
Malkəʾa Barbārā
Image of Barbara
-
- እግዚአብሔር፡ እግዚእ፡ ዘኢተጸርዐ፡ ስብሐቲከ፨
- እንበለ፡ ትፍጥር፡ መላእክተ፡ ዘይሴብሑ፡ ኪያከ፨
- መልክአ፡ በርባራ፡ እድርስ፡ እንዘ፡ እጼውዕ፡ ስመከ፨
- ተማሕፀንኩ፡ አንሰ፡ በማርያም፡ እምከ፨
- እስመ፡ ለማርያም፡ እምከ፡ ኪዳነ፡ ወሀብከ፨
-
- ሰላም፡ ለዝክረ፡ ስምኪ፡ በስመ፡ ክርስቶስ፡ ዘተጸውአ፨
- በዕለተ፡ ጥምቀት፡ አሐቲ፡ ሀብተ፡ መንፈስ፡ ቅዱስ፡ በጊዜ፡ ነሥአ፨
- በርባራ፡ ቅድስት፡ ዘኢትፈርሂ፡ ግፍአ፨
- ሐውጽኒ፡ በኪዳንኪ፡ በበ፡ ስብዕ፡ ስብዐ፨
- በአንብቦ፡ ጽኑዕ፡ ገድልኪ፡ እኩንኪ፡ መርድአ፨
-
- ሰላም፡ ለበድነ፡ ሥጋኪ፡ እግዚአብሔር፡ ዘአልዐሎ፨
- በነደ፡ እሳት፡ በላዒ፡ እስከ፡ ለዐላዊ፡ አህጐሎ፨
- እኅተ፡ ሰማዕታት፡ በርባራ፡ ዘጸናዕኪ፡ በተወክሎ፨
- ሰአሊዮ፡ ለአምላክኪ፡ ዘአርአየ፡ ኀይሎ፨
- ለገብርኪ፡ የሀበኒ፡ ተምኔትየ፡ ኵሎ፨
-
- እግዚአብሔር፡ አምላከ፡ ኵሉ፡ በአትሕቶ፡ ክሣድ፡ እሴብሐከ፨
- ኀይላተ፡ ሰማይ፡ ወምድር፡ ዘይሴብሑ፡ ኪያከ፨
- ለሰማዕትከ፡ በርባራ፡ እንተ፡ አግሀደት፡ ስመከ፨
- እወድሳ፡ በመሐልይ፡ ነግሀ፡ ወሰርከ፨
- እስመ፡ ፈቃድከ፡ ኮነ፡ ለኃጥእ፡ ገብርከ፨