መልክአ፡ እስጢፋኖስ፡
Malkəʾa ʾƎsṭifānos
Image of ʾƎsṭifānos
-
- ናሁ፡ ወጠንኩ፡ ለመልክኣቲከ፡ ኵሎን፨
- በበ፡ አስማቲሆን፨
- እስጢፋኖስ፡ ጻድቅ፡ ከሣቴ፡ ብርሃን፨
- ከመ፡ እንብብ፡ ድርሳናቲከ፡ መጽሐፈ፡ ሐዲስ፡ ኪዳን፨
- ዘተናገርዎ፡ መላእክት፡ ኄራን፨
-
- ሰላም፡ ለእስጢፋኖስ፡ ለአላኒቆስ፡ እጓሉ፨
- እምአፈ፡ ምውት፡ ዘደምጠ፡ ትእምርተ፡ ዕበዩ፡ ወብዕሉ፨
- ዝንቱ፡ አብ፡ ውዱስ፡ በአፈ፡ ኵሉ፨
- ዕዉራነ፡ ዐይን፡ አብርሃ፡ ጸበሉ፨
- ወካልኣነ፡ ሕሙማነ፡ ፈውሰ፡ በገድሉ፨
-
- ሰላም፡ ለፅንሰትከ፡ መስተፍሥሔ፡ ኵሉ፡ ፍጡር፨
- ወለልደትከ፡ ሰላም፡ ለወርኀ፡ ኅዳር፨
- እስጢፋኖስ፡ ድንግል፡ መምህረ፡ ትሕትና፡ ወፍቅር፨
- ምስሌከ፡ ማኅበራኒከ፡ በልደትከ፡ ክቡር፨
- ተፈሥሑ፡ ሰማያት፡ ወተሐሥየት፡ ምድር፨
-
- ሰላም፡ ለልደትከ፡ በዐውደ፡ ሕፃን፡ መካን፨
- በቃለ፡ አላኒቆስ፡ አብ፡ ወበኀይለ፡ አምላክ፡ መድኅን፨
- እስጢፋኖስ፡ ጻድቅ፡ እስጢፋኖስ፡ ካህን፨
- ሰአሎ፡ ለአምላክከ፡ አመ፡ ዕለተ፡ ፍዳ፡ ወደይን፨
- ይባልሐኒ፡ በምሕረቱ፡ ለብእሲ፡ ምኑን፨
-
- ሰላም፡ ለዝክረ፡ ስምከ፡ ዝክረ፡ ትጉሃን፡ መላእክት፨
- መዐዛ፡ ቅዱሳን፡ ሰማዕት፨
- እስጢፋኖስ፡ መምህር፡ አጽናዔ፡ ሃይማኖት፡ ርትዕት፨
- ዕቀበኒ፡ ለገብርከ፡ በጸሎትከ፡ ቅድስት፨
- አይምፃእ፡ በላዕሌየ፡ ጸላኢ፡ ስሑት፨
-
- ሰላም፡ ለፀአተ፡ ነፍስከ፡ ወለበድነ፡ ሥጋከ፡ ክልኤቱ፨
- ወለግንዘትከ፡ ሰላም፡ ምስለ፡ መቃብሪከ፡ ዝንቱ፨
- እስጢፋኖስ፡ ነፍስከ፡ ሶበ፡ ትወፅአ፡ በዝንቱ፨
- ተቀበልዋ፡ እንዘ፡ ይብሉ፡ መላእክት፡ በላዕሉ፡ ወታሕቱ፨
- ክቡር፡ በኀበ፡ ሰብእ፡ ለጻድቅ፡ ሞቱ፨
-
- ተወኪፈከ፡ እግዚኦ፡ ዘአቅረብኩ፡ በአስተሐምሞ፨
- ለመልክእከ፡ ሰላሞ፨
- እስጢፋኖስ፡ ወልዱ፡ ለአላኒቆስ፡ አበሞ፨
- አእሚረከ፡ እግዚእየ፡ ለሰብእናየ፡ ድካሞ፨
- ለፀርየ፡ ዘይኄይለኒ፡ በመስቀል፡ ግዝሞ፨
-
- ስብሐት፡ ይደሉ፡ ለዘአልዐለከ፡ ቀዲሙ፨
- ወዘቀደሰከ፡ በደሙ፨
- ወለመስቀሉ፡ ክቡር፡ ወለወላዲቱ፡ ወእሙ፨
- እስጢፋኖስ፡ ሐዋርያ፡ ሰባኬ፡ ወንጌል፡ በስሙ፨
- ይሴብሑ፡ ለስምከ፡ መላእክት፡ ኵሎሙ፨
-
- ናሁ፡ ፈጸምኩ፡ ስብሐተ፡ መልክእከ፡ በአሚን፨
- በፈቃደ፡ አምላክ፡ መድኅን፨
- ወልደ፡ አላኒቆስ፡ ወላዲ፡ እስጢፋኖስ፡ ካህን፨
- ባርከነ፡ በመስቀልከ፡ ለደቂቅከ፡ ምእመን፨
- በሀገር፡ ወበዝ፡ መካን፨