መልክአ፡ አላኒቆስ፡ ዘመይ፡ በራዝዮ፡
Malkəʾa ʾAlāniqos za-May Barāzyo
Image of ʾAlāniqos of May Barāzyo
-
- በስመ፡ አሐዱ፡ አምላክ፡ ወዕፀ፡ ሊባኖስ፡ መጾሩ፨
- ድርሳነ፡ መልክእከ፡ ወጠንኩ፡ እንብብ፡ በበ፡ ጾታሁ፡ ወኅብሩ፨
- አላኒቆስ፡ ፀሓይ፡ ዘታበርህ፡ ለለ፡ አሚሩ፨
- ጸግወኒ፡ ልሳነ፡ ዕዝራ፡ ወዘዮሐንስ፡ ፍቅሩ፨
- እለ፡ እምቀደምቶሙ፡ ጸንዑ፡ ወኵሎ፡ አእመሩ፨
-
- ሰላም፡ ለልደትከ፡ ዘኮነ፡ እምዘፈጸሙ፨
- ነገሥተ፡ እስራኤል፡ ጻድቃን፡ ሕገ፡ ኵሎሙ፨
- መናኔ፡ መንግሥት፡ አላኒቆስ፡ ወተድላ፡ ጣዕሙ፨
- አንተኑ፡ ለአኖሬዎስ፡ ዳግሙ፨
- ወለገዳማዊ፡ ዳንኤል፡ ዘኢዮር፡ ገዳሙ፨
-
- ሰላም፡ ለዝክረ፡ ስምከ፡ ዘያስተፌሥሕ፡ አልባበ፨
- ከመ፡ ወይነ፡ ቃና፡ ሐዋዝ፡ ዘበውስተ፡ ቃና፡ ተረክበ፨
- ምስለ፡ ዘሚካኤል፡ አረጋዊ፡ ከመ፡ ቃለ፡ ወንጌል፡ ነበበ፨
- አላኒቆስ፡ በሰማያት፡ እንዘ፡ ትጸንሕ፡ ከብካበ፨
- ኀደገ፡ እመ፡ ወመነንከ፡ አበ፨
-
- ሰላም፡ ለትንሣኤከ፡ እንተ፡ ያነሥኦ፡ ፈጣሪ፨
- አመ፡ ንፍሐተ፡ ቀርን፡ ደኃሪ፨
- አላኒቆስ፡ ክቡር፡ ዘመደ፡ ቂርቆስ፡ ወኤሪ፨
- ለሥጋየ፡ ዮናስ፡ ታወፅኦ፡ እምከርሠ፡ ጌጋይ፡ ዐንበሪ፨
- መሐሬ፡ ትሰመይ፡ ከመ፡ አብ፡ መሓሪ፨
-
- ድኅረ፡ ከመ፡ ሙሴ፡ ነቢይ፡ ከፈልከ፡ ቀላየ፨
- ወከመ፡ ኢያሱ፡ መስፍን፡ አቀምከ፡ ፀሓየ፨
- አላኒቆስ፡ በክብር፡ ጊዜ፡ አዕረፍከ፡ ሠናየ፨
- ዳዊት፡ ንጉሥ፡ ዘልበ፡ እግዚኡ፡ ተሰምየ፨
- ክቡር፡ ሞቱ፡ ለጻድቅ፡ እንዘ፡ ይብል፡ ሐለየ፨
-
- እምቅድመ፡ ይንሥአኒ፡ ሞት፡ ዘኢየኀድግ፡ ንጉሠ፨
- መጠነ፡ ድካምየ፡ ናሁ፡ ወደስኩከ፡ አንሰ፨
- አላኒቆስ፡ ባዕል፡ እንተ፡ ረከብከ፡ ሞገሰ፨
- ባርከኒ፡ አባ፡ በየማነ፡ እዴከ፡ ሥልስ፨
- ወታሕተ፡ ንግሥከ፡ ረስየኒ፡ ርእሰ፨
-
- ሰላም፡ ለከ፡ ኦአቡየ፡ ወላዴ፡ አዕናቍ፡ አእላፍ፨
- እማሕፀነ፡ ጸጋ፡ ቡርክት፡ አምሳለ፡ ሰይፍ፨
- ወአላኒቆስ፡ ብእሴ፡ መጽሐፍ፨
-
- ሰላም፡ ለከ፡ ኦአቡየ፡ እንተ፡ ተሎከ፡ ዐሰሮ፨
- ለክርስቶስ፡ ሰላመ፡ ወተፋቅሮ፨
- አምጣነ፡ በጸጋ፡ ፈጸምከ፡ ወሰለጥከ፡ ግብሮ፨
- ለመጽሔተ፡ አቡሁ፡ ዘሠምሮ፨