መልክአ፡ እግዚእ፡ ኀረያ፡
Malkəʾa ʾƎgziʾ Ḫarayā
Image of ʾƎgziʾ Ḫarayā
-
- ለእግዚእ፡ ኀረያ፡ ሠናይት፡ ወለጸጋ፡ ዘአብ፡ አዳም፨
- እኤምኆሙ፡ አንሰ፡ በቃለ፡ ሰላም፨
- እለ፡ ወለዱ፡ ኪያከ፡ ብርሃነ፡ ዓለም፨
- ተክለ፡ ሃይማኖት፡ ስቡረ፡ ዐፅም፡ እምብኅዘ፡ ቀዊም፨
- አውፅአነ፡ እምአዘቅተ፡ ሕርትምና፡ ወእምጽቡር፡ ዐምዐም፨
-
- ኦጸጋ፡ ዘአብ፡ ዘመደ፡ ነቢያት፡ ዘተሰመይከ፨
- ሰላም፡ ለከ፡ ምስለ፡ እግዚእ፡ ኀረያ፡ ብእሲትከ፨
- ከመ፡ እለ፡ ሙሴ፡ ወአሮን፡ ወዘካርያስ፡ አቡከ፨
- ጸጋ፡ ዘአብ፡ አቡየ፡ በብርሃነ፡ ሕይወት፡ ጸጋከ፨
- አብርህ፡ ሊተ፡ እግዚኦ፡ ለፍቁር፡ ወልደከ፨
- ሶበ፡ ፍና፡ አሚን፡ ቀዊምየ፡ እጼውዕ፡ ስመከ፨
-
- ሰላም፡ ለፅንሰትኪ፡ በሕገ፡ ሰብሳብ፡ ንጹሕ፨
- እምዘዮልያና፡ ቅድስት፡ በወርኀ፡ የካቲት፡ ወርኅ፨
- እግዚእ፡ ኀረያ፡ ብፅዕት፡ ምስለ፡ ጸጋ፡ ዘአብ፡ ፍሡሕ፨
- ዜና፡ ኂሩትኪ፡ በዝኀ፡ እመሥፈርተ፡ ንባብ፡ ዝኅዙኅ፨
- ወተኣምርኪ፡ እምኆፃ፡ ብዙኅ፨
-
- ሰላም፡ ሰላም፡ ለተፈጥሮትኪ፡ ሥና፨
- እግዚአብሔር፡ አምላክ፡ በብዙኀ፡ ጥበብ፡ ዘመጠና፨
- እግዚእ፡ ኀረያ፡ ብፅዕት፡ ትምክህተ፡ ደቂቃ፡ ለዮልያና፨
- በገዳምኪ፡ ምድረ፡ ዞረሬ፡ ካልእተ፡ ደብረ፡ ሕግ፡ ዘሲና፨
- በእደ፡ ሚካኤክ፡ ሴስዪነ፡ አውሪደኪ፡ መና፨
-
- ሰላም፡ ለዝክረ፡ ስምኪ፡ በጸጋ፡ ሃይማኖት፡ ዘተረሰየ፨
- ምስለ፡ እምነ፡ ጽዮን፡ ቡርክት፡ እመ፡ ቀውስጦስ፡ አቡየ፨
- እግዚእ፡ ኀረያ፡ ስምኪ፡ እስመ፡ ጽጌ፡ ተስፋ፡ ጸገየ፨
- በምድረ፡ ዞረሬ፡ ከርሥኪ፡ ተክለ፡ ሃይማኖት፡ ሥርናየ፨
- አመከዐበ፡ ስሳ፡ ወምእተ፡ ፈረየ፨
-
- ሰላም፡ ለመቃብርኪ፡ በደብረ፡ ዞረሬ፡ ስፍሕት፨
- አሜሃ፡ ለዘተገብረ፡ በእደ፡ ቅዱሳን፡ ካህናት፨
- እግዚእ፡ ኀረያ፡ ቡርክት፡ ወበቅድስና፡ ሥርጉት፨
- አምጣነ፡ አቅረብኩ፡ ለኪ፡ አምኃየ፡ አምኃ፡ ሥላሴ፡ ትሥልስት፨
- ወኢትትሐየዪኒ፡ ለኃጥእ፡ ገብርኪ፡ ትሑት፨
-
- ይትአኰት፡ እግዚአብሔር፡ ለእግዚእ፡ ኀረያ፡ ዘኀረያ፨
- ወመዋርስቲሁ፡ ለዘረሰያ፨
- አምሳለ፡ ማርያም፡ ድንግል፡ ኪዳነ፡ ምሕረት፡ አወፈያ፨
- ኅብስተ፡ ሰማይ፡ መጠዋ፡ ሲሳያ፨
- ወተስፋ፡ መድኃኒት፡ ለኃጥኣን፡ ሰመያ፨
-
- ሰላም፡ ሰላም፡ ለምድረ፡ ዞረሬ፡ ሕኑጽ፨
- እንበለ፡ ምንተኒ፡ ሕጸጽ፨
- እግዚእ፡ ኀረያ፡ ዕቀቢ፡ እግረ፡ ልቡናየ፡ እምዳኅጽ፨
- ወአለብውኒ፡ እግዝእትየ፡ አፍቅሮተ፡ አምላክ፡ ወቢጽ፨
- ከመ፡ ኢያዕቅፈኒ፡ ሊተ፡ ሐብለ፡ ሞት፡ ማእቀጽ፨