መልክአ፡ ዳንኤል፡ ዘወቄን፡
Malkəʾa Dānəʾel za-Waqen
Image of Dānəʾel of Waqen
-
- ሰላም፡ ለዝክረ፡ ስምከ፡ ሠናይ፡ ወአዳም፨
- ውስተ፡ አድባራተ፡ ኵሉ፡ ወዘውስተ፡ ኵሉ፡ ዓለም፨
- አለብወኒ፡ ዳንኤል፡ ብእሴ፡ ጸሎት፡ ወጾም፨
- ከመ፡ እንግር፡ ዜና፡ ጽድቅከ፡ ማዕከለ፡ ዛቲ፡ ኤላም፨
- ኀበ፡ ተጋብኡ፡ ደቂቅከ፡ ዮም፨
-
- ሰላም፡ ለቆምከ፡ በሀሊበ፡ ጸሎት፡ ዘልህቀ፨
- ወለመልክእከ፡ ይእቲ፡ እንተ፡ ኢሐፀት፡ ሕቀ፨
- ኢትትሐየኒ፡ ዳንኤል፡ ወኢትኅድገኒ፡ ጥቀ፨
- ኢይትሜነይ፡ አንሰ፡ አኮኑ፡ ተስፋ፡ መደልዋን፡ ወርቀ፨
- ባሕቱ፡ በረከትከ፡ እፈቱ፡ ጥዩቀ፨
-
- ጊዜ፡ ትወጽእ፡ ነፍስከ፡ እምነ፡ ሥጋ፡ መካና፨
- በእደ፡ ገብርኤል፡ መልአከ፡ ብስራት፡ ወዜና፨
- ዳንኤል፡ መምህረ፡ ትዕግሥት፡ ወትሕትና፨
- አልቦ፡ ዘይትበየጸከ፡ በክብር፡ ወበልዕልና፨
- እንበለ፡ ፃና፡ ቤተ፡ ቂርቆስ፡ ወካልእታ፡ ሲና፨
-
- ሰላም፡ ለፍልሰተ፡ ሥጋከ፡ አመ፡ አሚሩ፡ ለወርኀ፡ ታስዕ፨
- በእደ፡ አበው፡ አምኃ፡ ወታዴዎስ፡ ብፁዕ፨
- ዳንኤል፡ ነበልባላዊ፡ ነበሪ፡ ኀበ፡ እግረ፡ ዕፀ፡ ዐባይ፡ አውልዕ፨
- እብዕዎ፡ በይባቤ፡ ውስተ፡ ቤተ፡ መቅደስ፡ ምሥዋዕ፨
- በእደ፡ ማርያም፡ ንጉሥ፡ ወኖብ፡ እግዚእ፨
-
- አምኃ፡ ሰላም፡ አቅረብኩ፡ ለመልክእከ፡ ውዳሴ፨
- በሥምረተ፡ አብ፡ ወወልድ፡ ወመንፈስ፡ ቅዱስ፡ ሥላሴ፨
- ዳንኤል፡ መምህረ፡ ሥርዓት፡ ወክናሴ፨
- በከመ፡ ተወክፈ፡ እግዚእከ፡ ጸሎቶ፡ ለሙሴ፨
- ተወክፍ፡ አምኃየ፡ ለገብርከ፡ አውሴ፨
-
- ሰላም፡ ለከ፡ ዳንኤል፡ መምህረ፡ ሥርዓት፡ ወሕግ፨
- ያስተበፅዑከ፡ ኅሩያን፡ በደርግ፨
- እስከ፡ ደቂቅ፡ ወአእሩግ፨
-
- ሰላም፡ ለከ፡ ዳንኤል፡ በዕለት፡ አሐቲ፨
- እምጋኔነ፡ ቀትር፡ ወእምሰይጣን፡ መስሓቲ፨
- አባ፡ አድኅና፡ ለነፍስየ፡ ዛቲ፨