መልክአ፡ ስምዖን፡ አረጋዊ፡
Malkǝʾa Sǝmʿon ʾAragāwi
Image of Simeon the Elder
-
- ናሁ፡ ወጠንኩ፡ ዘመልክእከ፡ አኰቴተ፨
- እምኀበ፡ አምላክ፡ መሓሪ፡ እንዘ፡ እሴፎ፡ ረድኤተ፨
- ነቢየ፡ ልዑል፡ ስምዖን፡ ከመ፡ ፈጸምከ፡ ተምኔተ፨
- ፈጽም፡ ለነ፡ ሠናይተከ፡ እንተ፡ ወጠንኩ፡ ስብሐተ፨
- አኮ፡ በአብዝኆ፡ ባሕቱ፡ ንስቲተ፨
-
- ሰላም፡ ለዝክረ፡ ስምከ፡ ዘትርጓሜ፡ ስሙ፡ ብሂል፨
- እግዚአብሔር፡ ሰምዐኒ፡ ከመ፡ ሳሙኤል፡ ኀያል፨
- ርኅሩኀ፡ ልብ፡ ስምዖን፡ ኀዳጌ፡ በቀል፨
- ነዓ፡ ነዓ፡ ለባርኮ፡ ጉባኤ፡ ዝንቱ፡ በዓል፨
- ምስለ፡ ኢየሱስ፡ ክርስቶስ፡ ወእሙ፡ ድንግል፨
-
- ሰላም፡ ለፍልሰተ፡ ሥጋከ፡ ዘየዐቢ፡ ክብሩ፨
- እምእለ፡ ቀደሙ፡ ሕዝብ፡ ወእለ፡ ተድኅሩ፨
- ክብረከ፡ ስምዖን፡ ሶበ፡ መላእክት፡ አእመሩ፨
- ላዕለ፡ ማርያም፡ ጸለሉ፡ ክነፊሆሙ፡ ወስብሐቲከ፡ ዘመሩ፨
- ወበህየ፡ በዓለከ፡ ገብሩ፨
-
- ስብሐት፡ ለአብ፡ ወለወልድ፡ ቃሉ፨
- ወለመንፈስ፡ ቅዱስ፡ ሰላም፡ እንተ፡ ምስሌነ፡ የሄሉ፨
- ለስምዖን፡ አብ፡ ሶበ፡ ይደምፅ፡ በዓሉ፨
- መላእክት፡ ወሰብእ፡ ቃላቲሆሙ፡ አልዐሉ፨
- እስመ፡ በሰላም፡ ተፈጸመ፡ ኵሉ፨
-
- ይትባረክ፡ እግዚአብሔር፡ ዘኢይጤየቅ፡ ለዐይን፨
- ወዘኢይርሕቅ፡ ወትረ፡ እምአግብርቲሁ፡ ኄራን፨
- ከመ፡ ተነበይከ፡ ስምዖን፡ በቃለ፡ ማሕልይ፡ እሙን፨
- ያስተፌሥሐኒ፡ ጥቀ፡ በሰሚዖቱ፡ ሥነ፡ በዓልከ፡ ወይን፨
- ከመ፡ መሰንቆ፡ ሐዋዝ፡ ወፋጻ፡ ቀጢን፨