መልክአ፡ ዮሐኒ፡ ዘደብረ፡ ዓሣ፡
Malkəʾa Yoḥanni za-Dabra ʿĀśā
Image of Yoḥanni of Dabra ʿĀśā
-
- ኦክርስቶስ፡ ባሕርየ፡ ባሕርዩ፡ ለአብ፨
- ዘይቄድስዎ፡ ዘልፈ፡ ቀዳስያኒሁ፡ አርጋብ፨
- መንፈሰ፡ አእምሮ፡ ምልአኒ፡ እመዝገብከ፡ ጥበብ፨
- ከመ፡ እንግር፡ ለኵሉ፡ መዝሙረ፡ ዮሐኒ፡ መክብብ፨
- ዘዐርገ፡ ሰማያተ፡ ኀበ፡ ቦ፡ ከብካብ፨
-
- ሰላም፡ ለዝክረ፡ ስምከ፡ እምዝክረ፡ ቅዱሳን፡ ውዱስ፨
- ወለሥዕርትከ፡ ጥሉል፡ በቅብአ፡ ቅዳሴ፡ ርሑስ፨
- ዐምደ፡ ንጽሕና፡ ዮሐኒ፡ እምቤተ፡ መንፍሥት፡ ወንግሥ፨
- ዜናከ፡ እንግር፡ ለኵሉ፡ በልሳነ፡ መንፈስ፡ ቅዱስ፨
- ያንሥአኒ፡ እምውጺቅ፡ እዴከ፡ ክርስቶስ፨
-
- ሰላም፡ ለመልክእከ፡ ሱራኄ፡ መብረቅ፡ ግሩም፨
- ዘየዐውዶ፡ ፍጹመ፡ እመልክአ፡ አዳም፡ ፍጹም፨
- ዮሐኒ፡ ክቡር፡ በብሔርከ፡ ሰላም፨
- ሐውጸነ፡ በበዓልከ፡ ለእለ፡ ተጋባእነ፡ ዮም፨
- ውስተ፡ ጽርሐ፡ ልዑል፡ ጽርሕከ፡ ሐፃኒት፡ እም፨
-
- ሰላም፡ ለዕርገትከ፡ እምብሔረ፡ ድካም፡ ወጻማ፨
- መንገለ፡ ተሠርዐ፡ ፍጹመ፡ ማዕደ፡ ዕረፍት፡ ዘራማ፨
- ዮሐኒ፡ ክቡር፡ ለመጽሐፈ፡ ግዕዛን፡ ግርማ፨
- ክብርከ፡ ማኅቶተ፡ ሌዊ፡ ትሬስዮ፡ ተቅዋማ፨
- ወበዐምደ፡ ወርቅ፡ ጸሐፍ፡ ለስምየ፡ ስማ፨
-
- ሰላም፡ ለሑረትከ፡ በፍኖተ፡ ነቢይ፡ ዕዝራ፨
- እንዘ፡ ይመርሑከ፡ ደርገ፡ ሰማያውያን፡ ሐራ፨
- ዮሐኒ፡ ኤልያስ፡ ክሉለ፡ ሞገስ፡ ወጌራ፨
- መኒነከ፡ ተድላሃ፡ ወአስተሐቂረከ፡ ክብራ፨
- ለዛቲ፡ ዓለም፡ ዘምልዕልት፡ መከራ፨
-
- ሰላም፡ ለህላዌከ፡ እምህላዌ፡ ነገሥት፡ ዘይሤኒ፨
- ወለትርሲትከ፡ ዕንቍ፡ ዘሥነ፡ ጸዳሉ፡ አዶኒ፨
- ረድአ፡ ምሥጢሩ፡ ዮሐኒ፡ ለመምህረ፡ ምስር፡ አሞኒ፨
- አባ፡ ገድልከ፡ ወሬዛ፡ እምገድለ፡ ቅዱሳን፡ ሞአኒ፨
- ወለተናግሮ፡ በአፍ፡ ዜናከ፡ ኖኀኒ፨
-
- ስብሐት፡ ለከ፡ አምላኪየ፡ ዘወሀብከኒ፡ ሥልጣነ፨
- ወድርሳነ፡ ዮሐኒ፡ ግብረከ፡ ከመ፡ እፈጸም፡ ፍጡነ፨
- እግዚኦ፡ ተወከፍ፡ ዘልቡናየ፡ ብጽዐነ፨
- ወኢይበል፡ በልብከ፡ ኢይትዌከፍ፡ አነ፨
- አኰቴተ፡ ብእሲ፡ ኃጥእ፡ ግዱፈ፡ ኮነ፨