መልክአ፡ ፋሲለደስ፡
Malkǝʾa Fāsiladas
Image of Basilides
-
- ናሁ፡ ወጠንኩ፡ ተኣምሪከ፡ እዜኑ፨
- ወውዳሴከ፡ ዘተርፈ፡ እምእክለ፡ ብዙኃን፡ ወጠኑ፨
- ፋሲለፈስ፡ መኰንን፡ ዘሠርዐከ፡ አብ፡ በምኵናኑ፨
- ከመ፡ እንግር፡ ለምእመናን፡ እለ፡ ኪያከ፡ ተአምኑ፨
- ዘይትራድአኒ፡ መንፈሰከ፡ ፈኑ፨
-
- ጐሥዐ፡ ልብየ፡ ቃለ፡ ሠናየ፡ በአእምሮ፨
- ዜና፡ ተኣምሪከ፡ ኣየድዕ፡ ወሐዘነ፡ ልብየ፡ በአስተድኅሮ፨
- ፋሲለደስ፡ ጳውሎስ፡ ብዙኀ፡ ሕማም፡ ወተጽዕሮ፨
- መኑ፡ ከማከ፡ ለመስቀል፡ እንዘ፡ ያስተቃልል፡ ጾሮ፨
- ዘሃይማኖቶ፡ ዐቀበ፡ ወፈጸመ፡ በድሮ፨
-
- እምተኣምሪከ፡ ብዙኅ፡ ዘኢይትፍፌጸም፡ በጽሒፍ፨
- ናሁ፡ ጸሐፍኩ፡ መጠነ፡ ነጠብጣበ፡ ማይ፡ ወሐፍ፨
- ፋሲለደስ፡ ወርቅየ፡ በእሳተ፡ ኵነኔ፡ ንጡፍ፨
- ተወከፍ፡ ሊተ፡ እግዚእየ፡ ከመ፡ መሥዋዕት፡ ውኩፍ፨
- ወአዝዝ፡ ይልክእዎ፡ በኵሉ፡ መጽሐፍ፨
-
- በዝንቱ፡ ዜና፡ ተኣምሪከ፡ በተአምኖ፡ ሶበ፡ ሰአሉ፨
- አልባበ፡ ትኩዛን፡ ሰብእ፡ ወነፍሰ፡ ጽኡራን፡ ኵሉ፨
- ፋሲለደስ፡ ስማዕ፡ ስእለቶሙ፡ ለለ፡ መዋዕሉ፨
- እመ፡ ፈጸምከ፡ ተምእቶሙ፡ በቃለ፡ ትፍሥሕት፡ ይበሉ፨
- አማን፡ መንክር፡ ተኣምሪሁ፡ ወዐቢይ፡ ኀይሉ፨
-
- ሰላም፡ ለከ፡ ገባሬ፡ ተኣምር፡ ወኀይል፨
- በእድ፡ ጽንዕት፡ ወበመዝራዕት፡ ልዑል፨
- ፋሲለደስ፡ ዮም፡ ለሕዝበ፡ ግራኝ፡ ሐቃዽ፨
- አሥጠሞሙ፡ ባሕር፡ በኀይልከ፡ ወደፈኖሙ፡ ማዕበል፨
- ለአውዕዮ፡ ቤትከ፡ ሶበ፡ መጽኡ፡ እምርኁቅ፡ ደወል፨