መልክአ፡ ይርድአነ፡ ክርስቶስ፡ ዘሎጎጭዋ፡
Malkəʾa Yǝrǝdʾanna Krǝstos za-Logoč̣č̣ǝwā
Image of Yǝrǝdʾanna Krǝstos of Logoč̣č̣ǝwā
-
- ሰላም፡ ለዝክረ፡ ስምከ፡ ዘኍልቈ፡ ፊደሉ፡ ዓሥር፨
- ወለሥዕርትከ፡ ጸሊም፡ ምስለ፡ ድማኅከ፡ ክቡር፨
- ይርድአነ፡ ክርስቶስ፡ ሕፃን፡ ሱታፌ፡ ሕፃናት፡ ዘበኵር፨
- ከመ፡ ኣይድዕ፡ በበ፡ ጾታሁ፡ ጣዕመ፡ ዝክርከ፡ ሶከር፨
- ጽዋዐ፡ ልቡና፡ ምልአኒ፡ ዘዕዝራ፡ ማዕምር፨
-
- ሰላም፡ ለፍልሰተ፡ ሥጋከ፡ እምነ፡ ውሣጢት፡ ዘገዳም፨
- ወለዝኅርከ፡ እሙር፡ ምስለ፡ ክርታስከ፡ ሥዩም፨
- ይርድአነ፡ ክርስቶስ፡ ኮነ፡ ከመ፡ አመርከ፡ በሕልም፨
- አንተኑ፡ ሕፃን፡ ዘባረኮ፡ በወንጌለ፡ መንግሥት፡ እም፨
- ቅድመ፡ ኢየሱስ፡ ክርስቶስ፡ መድኃኔ፡ ዓለም፨
-
- ሰላም፡ ለቤተ፡ ዝኅርከ፡ በአንጻረ፡ ቤታ፡ ለድንግል፨
- ከመ፡ ጎልጎታ፡ ዘኮነት፡ ለምስጋድ፡ ወለምስአል፨
- ይርድአነ፡ ክርስቶስ፡ ዋሕድ፡ እምሕፃናተ፡ ወንጌል፨
- ኅድግዎሙ፡ ይምጽኡ፡ ኀቤየ፡ ዘይቤሎሙ፡ ልዑል፨
- እስመ፡ ለዘከመ፡ እሉ፡ ይእቲ፡ መንግሥት፡ ወብዕል፨
-
- ሰላም፡ ለአዘቃቲከ፡ ውስተ፡ ጥንቃቅአት፨
- ወመጽያሕተ፡ ለፀበልከ፡ ርጡን፡ ምስለ፡ ማያቲሁ፡ ሕይወት፨
- ይርድአነ፡ ክርስቶስ፡ ዳዊት፡ ዘሐጸነትከ፡ የዋሂት፨
- መጋቤ፡ ኩነኒ፡ ለገብርከ፡ እምሰዓተ፡ ኵሉ፡ መንሱት፨
- በዘተውህበከ፡ እም፡ አምላክ፡ ኪዳነ፡ ምሕረት፨
-
- ተወኪፈከ፡ ዘንተ፡ አስተአየ፡ ዘአባላቲከ፡ ውዳሴ፨
- እንዘ፡ አስተታሉ፡ ዘአቅረብኩ፡ ጸውኦ፡ ስሙ፡ በሥላሴ፨
- ይርድአነ፡ ክርስቶስ፡ ሀበኒ፡ ሀብተ፡ በረከቱ፡ ለአውሴ፨
- ለዘጽህቁ፡ ወድሶተከ፡ በጥንቃቄ፡ ዐቢይ፡ ኁሣሤ፨
- ንዴት፡ ይኩነኒ፡ ጸጋከ፡ ሐዳሴ፨
-
- ሰላም፡ ለከ፡ ሕፃነ፡ አእምሮ፡ ፍልሱፍ፨
- ዘውገ፡ ሕፃናት፡ አእላፍ፨
- እለ፡ ቀተሎሙ፡ ሄሮድስ፡ በብልሀ፡ ሰይፍ፨
- ይርድአነ፡ ክርስቶስ፡ ሰብለ፡ መጽሐፍ፨
-
- ሰላም፡ ለከ፡ ዘኀረየከ፡ ልዑል፨
- እንበለ፡ ምግባር፡ ወገድል፨
- ሕፃነ፡ ይዋሄ፡ ሕሩመ፡ በቀል፨
- ይርድአነ፡ ክርስቶስ፡ ገብረ፡ መስቀል፨