-
- በስመ፡ እግዚአብሔር፡ ፀሓይ፡ እንተ፡ ይነብር፡ ሰማየ፨
- ወበስመ፡ ድንግል፡ ሰማይ፡ እንተ፡ ትጸውር፡ ፀሓየ፨
- ኣአኵተከ፡ ማትያስ፡ አባ፡ ወአቡየ፨
- ከመ፡ እንግር፡ ቅድመ፡ ኵሉ፡ ስመ፡ ዚአከ፡ ዐቢየ፨
- ተሠሀለኒ፡ ወሰምዐኒ፡ ለከ፡ ይብለከ፡ ልብየ፨
-
- ሰላም፡ ለዝክረ፡ ስምከ፡ እምልበ፡ ጠቢባን፡ ዘተሰወረ፨
- ውስተ፡ አፈ፡ ደቂቅ፡ ትክሥት፡ ምሥጢረ፡ ሰብቲከ፡ ድኅረ፨
- እምክብረ፡ ኢያሱ፡ ማትያስ፡ እንተ፡ አፈድፈድከ፡ ክብረ፨
- ዘተፈትሐ፡ እግረ፡ ፀሓይ፡ በጸሎትከ፡ ተአሥረ፨
- ወእግረ፡ ኃንካሳን፡ እሱር፡ አርትዐ፡ ሐዊረ፨
-
- ሰላም፡ ለዘባንከ፡ ሥርግወ፡ ጥብጣቤ፡ አነዳ፨
- ወለእንግድዓከ፡ ዘኮነ፡ ለርእስከ፡ አእምሮ፡ ሰሌዳ፨
- ዘተሳተፍከ፡ ማትያስ፡ ምስለ፡ ንቡረ፡ እድ፡ ሲኖዳ፨
- ተአየን፡ ምስለ፡ ዘዮና፡ ለደብረ፡ ጊዮርጊስ፡ በዐውዳ፨
- ንኡሰ፡ ወዐቢየ፡ ትባርክ፡ ውሉዳ፨
-
- ሰላም፡ እብል፡ ለአጽፋረ፡ እግርከ፡ አፃብዕ፨
- ዘተቀጸላ፡ አጽፋረ፡ አክሊላተ፡ ብርሃን፡ ካልእ፨
- ወልደ፡ ነጐድጓድ፡ ማትያስ፡ ፍቁረ፡ እግዚእ፨
- ለድማኅ፡ ኢታንትግ፡ ጸልዮ፡ ለተከሥተ፡ ብርሃን፡ ብፁዕ፨
- እስመ፡ ደብተራሁ፡ አንተ፡ ተከላ፡ ለስምዕ፨
-
- ሰላም፡ ለግንዘተ፡ ሥጋከ፡ በእደ፡ መላእክት፡ ኄራን፨
- ወለመቃብሪከ፡ በደብር፡ እንተ፡ ከለሎ፡ ብርሃን፨
- ሠያሜ፡ ካህናት፡ ማትያስ፡ ጽኑዐ፡ ሥልጣን፨
- እለ፡ ገብሩ፡ ተዝካረከ፡ አመ፡ ይመጽእ፡ መድኅን፨
- ይወርሱ፡ ዓለመ፡ ተስፋሆሙ፡ ለጻድቃን፨
-
- ሰላም፡ ለፍልሰተ፡ ዐፅምከ፡ ዘይኄይሎ፡ ጽዕዳዌ፨
- ወለትንሣኤከ፡ ዘይጸንሕ፡ እንተ፡ ይመጽእ፡ መርዓዌ፨
- መምህረ፡ ዓለም፡ ማትያስ፡ ዘአጥፋእከ፡ ግብረ፡ ምንታዌ፨
- አብጽሐነ፡ ውስተ፡ ሠናይ፡ እንበለ፡ ሕማም፡ ወደዌ፨
- በቲከከ፡ ኅምዘ፡ ኀይሉ፡ ለንስጥሮስ፡ አርዌ፨
-
- ሰላም፡ ለበአትከ፡ ዐይነ፡ መልአከ፡ ሞት፡ ኀበ፡ ኢይርእያ፨
- መልአከ፡ ብርሃን፡ ማትያስ፡ ለደብረ፡ ድማኅ፡ ፀሓያ፨
- ለዕለተ፡ ሞትከ፡ ጽዮን፡ ቀዳሚ፡ ሰማዕት፡ ዘኀረያ፨
- በደሙ፡ ክቡር፡ ቀደሳ፡ ያዕቆብ፡ ሐዋርያ፨
- ወገሪማ፡ በዓለ፡ ሰመያ፨
-
- አምኃ፡ ሰላም፡ አቅረብኩ፡ ስብሐተ፡ መልክእከ፡ በኍልቈ፡ ራብዕ፡ ሱባዔ፨
- ሀበኒ፡ አባ፡ ማትያስ፡ ተስፋ፡ ትንሣኤ፨
- ወበተአምኖ፡ ይንሥኡ፡ በረከተከ፡ በቋዔ፨
- ማኅበረ፡ ካህናት፡ ዘተጋብኡ፡ ውስተ፡ ድማኃዊት፡ ጉባኤ፨
- ኪያከ፡ ይጸውዑ፡ ዐርከ፡ ኪያከ፡ አባ፡ ኪያከ፡ መጋቤ፡ ወኪያከ፡ ረዳኤ፨