መልክአ፡ ዘመድኅን፡ ዘደብረ፡ ድማሕ፡
Malkəʾa Zamadḫǝn za-Dabra Dəmāḥ
Image of Zamadḫǝn of Dabra Dəmāḥ
-
- ጥበበ፡ ልቡና፡ ሀበኒ፡ ወጸግወኒ፡ ልሳነ፨
- ጰራቅሊጦስ፡ እንተ፡ ትጼሁ፡ አሜነ፨
- ላዕላዐ፡ ልሳን፡ ገብርከ፡ ከመ፡ እንብብ፡ አነ፨
- ሰላመ፡ መልክኡ፡ ለዘመድኅን፡ አቡነ፨
- ለዐቢይ፡ ወለንኡስ፡ መርሐ፡ ጽድቅ፡ ዘኮነ፨
-
- ሰላም፡ ሰላም፡ ለዝክረ፡ ስምከ፡ ቅዱስ፨
- ወለሥዕርትከ፡ ሰላም፡ በከተማ፡ ርእስ፨
- ዘመድኅን፡ አቡነ፡ ዘሐፀንከኒ፡ እምንእስ፨
- አንጽሐኒ፡ በጸሎትከ፡ ወቀድሰኒ፡ እምርኩስ፨
- ወምርሐኒ፡ ሊተ፡ ኀበ፡ ዘኀን፡ ወመርስ፨
-
- ሰላም፡ ለትንሣኤከ፡ በዕለት፡ ደኃሪ፨
- በተልዕሎትከ፡ ላዕለ፡ ተልዕሎተ፡ ንስር፡ ሰራሪ፨
- ዘመድኅን፡ ጸሊ፡ ቀዊመከ፡ ቅድመ፡ ፈጣሪ፨
- ታንጽሐኒ፡ እምአበሳየ፡ ወጌጋይየ፡ ታስተስሪ፨
- እስመ፡ ርኅሩኀ፡ ልብ፡ ውእቱ፡ ወአምላክ፡ መሓሪ፨
-
- ለምንት፡ ኀደገነ፡ ወመነንከነ፡ እስከ፡ ይእዜ፨
- ለውሉድከ፡ ኀዘን፡ ዘአስጠመነ፡ ከመ፡ ተከዜ፨
- እንዘ፡ ንብል፡ ከመዝ፡ ይሔውጸነ፡ ማእዜ፨
- ንበኪ፡ ለዕለቱ፡ እምጊዜ፡ ለጊዜ፨
- ኪያከ፡ አባ፡ ኪያከ፡ ናዛዜ፨
-
- ኢይትርፍ፡ በከ፡ ለልሳንየ፡ ንባቡ፨
- በከመ፡ ይቤ፡ በትንቢት፡ ለሐሳብከ፡ ሐሳቡ፨
- ዘመድኅን፡ ገብሩ፡ ለእግዚአብሔር፡ ቅሩቡ፨
- እመ፡ ይዘሩ፡ ለነዳያን፡ እምነ፡ ዙኀ፡ መዝገቡ፨
- ከመ፡ ትዘከረኒ፡ ሊተ፡ በልብከ፡ ለቡ፨
-
- ይትባረክ፡ እግዚአብሔር፡ በስፍሐ፡ ሰማዩ፡ ወምድሩ፨
- ወይትአኰት፡ ስሙ፡ በልሳነ፡ ኵሉ፡ ፍጡሩ፨
- ከመ፡ እትናገር፡ ኅዳጠ፡ አምጣነ፡ ብዙኀ፡ ምሥጢሩ፨
- ሰላመ፡ መልክኡ፡ ለዘመድኅን፡ ፍቁሩ፨
- ዘከሠተ፡ ሊተ፡ ለኃጥእ፡ ገብሩ፨